Беларуска заплаціла 1000 еўра за пошук польскіх каранёў, а атрымала фота падробленага ўкраінскага дакумента
Прабабуля і прадзядуля Алесі (імя зменена) былі палякамі, таму яна вырашыла аформіць карту паляка. Пасведчанне асобы прабабулі захавалася, а ад прадзядулі засталася толькі ваенная кніжка — у ёй нацыянальнасць не пазначаная. Каб знайсці пацвярджэнне яго паходжання, дзяўчына звярнулася ў агенцтва. Заплаціла 1000 еўра, але атрымала толькі фатаграфію падробленага пасведчання аб нараджэнні сваёй маці. «Арыгінал» абяцалі даслаць пасля пералічэння яшчэ 1000 еўра. Сваёй гісторыяй беларуска падзялілася з MOST.
Алеся прыехала ў Польшчу вясной гэтага года. Дзяўчына была ўпэўненая, што праблем з пошукам польскіх каранёў не будзе: уся сям'я жыла ў Гродзенскай вобласці, якая з 1921 па 1939 год уваходзіла ў склад Польшчы. Прадзядуля Алесі служыў у польскім войску, пра гэта і сведчыць ваенная кніжка. Але нацыянальнасць — паляк — у ёй не прастаўленая.
Каб атрымаць карту паляка — дакумент, які пацвярджае прыналежнасць да польскай нацыі, — дастаткова даказаць, што маці, бацька, бабуля або дзядуля былі палякамі. А вось калі гаворка ідзе пра папярэдняе пакаленне — прабабуль і прадзядуль, — то патрабуецца пацвердзіць польскае паходжанне адразу двух з іх.
«Магчыма, у агенцтва свае метады»
Каб знайсці дакументы прадзядулі, Алеся і яе малады чалавек вырашылі звярнуцца ў адно з агенцтваў, якія займаюцца пошукам польскіх каранёў. Пры выбары арыентаваліся на водгукі. Адно выклікала сумневы, другое здавалася надзейным.
— Агенцтва было зарэгістравана ў Малдове ці Румыніі, дакладна ўжо не ўспомню. Мы не праверылі іх загадзя, а проста напісалі і патэлефанавалі праз Telegram. Мой малады чалавек размаўляў з імі па ўсіх пытаннях. Там папрасілі даслаць дакументы, радавод і запоўніць файл з інфармацыяй пра дом, бабуль, прабабуль і іншых сваякоў. Я ўсё падрыхтавала і адправіла, — расказвае Алеся.
Яна заплаціла аванс — 1000 еўра. Спачатку ў агенцтве абяцалі, што праца зойме месяц, потым удакладнілі — два-тры тыдні. У дзяўчыны ўжо тады з'явіліся сумневы.
— Звычайна на архіўныя пошукі сыходзіць як мінімум месяц. Але падумала, магчыма, у агенцтва свае метады, — кажа яна.
З Гродзенскай вобласці — у Валынскую
Праз два тыдні Алесі прыйшоў скан «дакумента» — нібыта савецкага пасведчання аб нараджэнні яе маці. У ім была тая ж інфармацыя, што і ў рэальным пасведчанні, копію якога Алеся сама дала агенцтву. Вось толькі бланк быў не на беларускай, а на ўкраінскай мове — выдала пасведчанне нібыта Луцкае бюро ЗАГС Валынскай вобласці.
І ў графе «нацыянальнасць» маці, то бок бабулі Алесі, значылася ўжо не беларуска, як у арыгінальным дакуменце, а полька.
Цікава, што месца нараджэння маці не памянялі — усё тая ж вёска ў Гродзенскай вобласці. Але ў куце дадалі надпіс ад рукі: «Адноўлена». Як быццам першапачатковае пасведчанне аб нараджэнні маці згубілася, і яго прыйшлося аднавіць — праз тры гады ў Валынскай вобласці.
Алеся падкрэслівае, што насамрэч сям'я ўвесь час жыла ў адным і тым жа доме ў Гродзенскай вобласці і ва Украіну не пераязджала.
— Я сказала ім, што гэта незаконна і што потым могуць узнікнуць праблемы. Але там звялі ўсё да простай формулы: «Вам патрэбныя былі дакументы для атрымання карты паляка? Мы іх зрабілі, з такімі вы карту атрымаеце. Мэта з нашага боку дасягнутая», — успамінае Алеся.
«Наўрад ці я штосьці дакажу»
«Сапраўднае», то-бок папяровае, пасведчанне абяцалі даслаць пасля аплаты другой часткі ганарару агенцтва — яшчэ 1000 еўра. Але дзяўчына патлумачыла, што хацела знайсці сапраўдныя архіўныя дакументы, а не падробленыя.
У агенцтве паабяцалі разабрацца і ператэлефанаваць, але перапіску выдалілі і на сувязь больш не выходзілі.
— Спачатку я думала напісаць заяву і паспрабаваць вярнуць грошы, але потым перадумала — наўрад ці я штосьці дакажу, — прызнаецца Алеся.
Каментары
Прафесія -- беларус, па паходжанні беларус -- турма і вошы.
Прафесія рускі, па паходжанні беларус -- бясплатна.
[Зрэдагавана]