Да ветэранаў спецназа Паўлічэнкі прыязджаў незвычайны госць: беларус, але мусульманін
На чарговыя заняткі па тактычнай падрыхтоўцы добраахвотніцкага атрада Асацыяцыі ветэранаў спецназа МУС, якім кіруе сумнавядомы адстаўны палкоўнік Дзмітрый Паўлічэнка, у пачатку чэрвеня прыязджаў незвычайны госць, заўважыў Mayday.team.
Нібыта «з мэтай абмену досведам» Мінск наведаў старшыня Рады крапавых берэтаў вайскоўцаў запасу Карэліі, ураджэнец беларускай сталіцы Сяргей Дзятко. Аднак у Карэліі ён вядомы пад іншым імем — Дзятко Саід Абдул Азіз (Сяргей) Аляксандравіч. Ён старшыня Духоўнага ўпраўлення мусульман Рэспублікі Карэлія (Карэльскі Мухтасібат).
Дзмітрый Паўлічэнка, вядомы як камандзір лукашэнкаўскіх «эскадронаў смерці» яшчэ 1990-х гадоў, прадставіў госця як ветэрана, які праходзіў службу ў яшчэ савецкіх падраздзяленнях па барацьбе з тэрарызмам, удзельніка 11 баявых аперацый, у тым ліку ва Узбекістане, Нагорным Карабаху, Абхазіі, а таксама па вызваленні закладнікаў у Сухумі ў 1990 годзе (на той момант Сяргею Дзятко было ўсяго 20 гадоў).
Пры гэтым Паўлічэнка не казаў, што ў 1997 годзе спецназавец Сяргей Дзятко прыняў іслам у Інгушэціі, праз чатыры гады выехаў у Ліван вучыць арабскую мову, а па вяртанні на працягу трох гадоў быў памочнікам муфтыя Беларусі па пытаннях адукацыі.
Пасля гэтага ён скончыў бакалаўрыят шарыяцкага факультэта ў Еўрапейскім інстытуце гуманітарных навук ва Уэльсе, а з 2010 года — пасля размеркавання выпускнікоў — ён стаў імамам мячэці ў Петразаводску.
У цяперашні візіт у Мінск ён прыязджаў з жонкай, магілёўкай Мар'ям Кавалёвай, якая таксама прыняла іслам. У Мінску і Гомелі яна перыядычна праводзіць рэлігійныя заняткі для дзяцей сем'яў, якія прынялі іслам, а таксама вядзе працу супольнасці мусульманак Беларусі.
У Карэліі Абдул Азіз таксама перыядычна надзявае вайсковую форму і савецкія ордэны і ў такім выглядзе праводзіць лекцыі для салдат авіяпалка ў пасёлку Бесавец. Муфтый спрабуе прышчапіць расійскім навабранцам асновы ісламу і праводзіць гутаркі духоўна-маральнага зместу.
Мусульмане Расіі імкнуцца не кранацца тэмы вайны Расіі супраць Украіны, але актыўна дапамагаюць жыхарам Газы. Муфтый Карэліі Шэйх Абдул Азіз перыядычна ездзіць на курсы павышэння кваліфікацыі ў Анкару.
Цяпер чытаюць
Сакратар Рады бяспекі заклікаў беларусаў устрымацца ад паездак у Расію8
Каментары