1 красавіка споўнілася 70 гадоў графіку Уладзіміру Басалыгу (1.04.1940, Слуцк Мінскай вобласці).
Першы намеснік старшыні Беларускага саюза мастакоў (БСМ) Рыгор Сітніца адзначыў, што для яго Басалыга з'яўляецца прыкладам служэння нацыянальнаму мастацтву. Яго імя знаходзіцца ў шэрагу імёнаў такіх славутых дзеячаў айчыннага выяўленчага мастацтва, як Лявон Баразна, Яўген Кулік, Аляксей Марачкін, Васіль Шаранговіч і Міхась Басалыга. «Менавіта гэтыя людзі пачыналі нацыянальную адраджэнскую тэматыку ў беларускім мастацтве», — падкрэсліў Сітніца. Паводле яго слоў, пасля да гэтай кагорты мастакоў-адраджэнцаў далучыліся Мікола Купава, Уладзімір Савіч і Міхась Раманюк. «На іх досведзе нашаму пакаленню мастакоў было значна прасцей далучацца да адраджэнскага працэсу», — сказаў Сітніца.
Графічную серыю Басалыгі «Помнікі дойлідства Беларусі» намеснік старшыні БСМ назваў «велізарным» ўнёскам у нацыянальнае выяўленчае мастацтва. «Гэтыя творы з высокімі мастацкімі вартасцямі ўпершыню дазволілі многім беларусам шырока пазнаёміцца з айчыннай архітэктурнай спадчынай», — адзначыў Сітніца.
Уладзімір Басалыга паведаміў, што зараз працуе над графічнай гісторыка-архітэктурнай серыяй, у якой будуць адлюстраваны помнікі айчыннага дойлідства — ахвяры духоўнага Чарнобыля. Паводле яго слоў, гаворка ідзе пра архітэктурную спадчыну, якая загінула ад войнаў, недагляду, а таксама ў перыяд савецкага ваяўнічага атэізму.
«Толькі на тэрыторыі Слуцкага раёна Мінскай вобласці да нашых часоў не дайшлі каля 30 цэркваў і касцёлаў. І я хачу аднавіць іх выгляд», — сказаў Басалыга.
Паводле яго слоў, зрабіць гэта цяжка, таму што пра гэтыя храмы не захаваліся выяўленчыя матэрыялы. «Так, з загінулай культавай спадчыны Случчыны да нас дайшлі толькі чарцяжы і дрэнныя фотаздымкі пяці цэркваў і аднаго касцёла. Выгляд астатніх храмаў давядзецца ўзнаўляць па сціплых пісьмовых звестках кшталту таго, што «на замчышчы стаяў сабор а пяці главах», — адзначыў мастак.
Выставу сваіх твораў ён плануе правесці ў Мінску пры канцы гэтага года.
Каментары