У адным будынку — спа, супермаркет і бізнэс-апартаменты. У «Мінск-Свеце» пабудуюць незвычайны дом
У квартале «Заходні» жылога комплексу «Мінск-Свет» узвядуць шматфункцыянальны комплекс, які аб'яднае пад адным дахам бізнэс-апартаменты, гандлёвы аб'ект і ФАК. Дом атрымае назву «Кантыненталь». Ужо заўтра забудоўшчык пачне афармляць дамовы долевага будаўніцтва, піша «Анлайнер».
Галоўная асаблівасць комплексу — там не будзе кватэр у звыклым разуменні. Замест іх — шматфункцыянальныя апартаменты. Гэта 374 памяшканні на другім-сёмым паверхах, якія можна выкарыстоўваць і для пражывання, і для вядзення бізнэсу. Сярод іх будуць і двухузроўневыя віп-варыянты з выхадам на тэрасу, якая размесціцца ў зоне эксплуатаванага даху.
Цэнтральны атрыум будынка — васьміпавярховы. Там размесцяцца зона рэцэпцыі, харчовы супермаркет і гіпермаркет будматэрыялаў, некалькі фуд-кортаў, фітнэс-цэнтр, боўлінг.
На цокальным паверсе запраектаваны фізкультурна-аздараўленчы комплекс з дарослым і дзіцячым басейнамі, джакузі і саўнамі.
У будынку прадугледжаны эксплуатаваны дах з зонамі адпачынку, дзіцячымі гульнявымі комплексамі, спартыўнымі пляцоўкамі з вулічнымі трэнажорамі. Там будуць выкарыстаныя элементы ландшафтнага дызайну, малыя архітэктурныя формы і розныя віды пакрыцця — ад каменнага брукавання для сухой ракі да глебавага субстрата для высадкі шматгадовых раслін.
На даху плануюць праводзіць сезонныя мерапрыемствы і нават усталяваць фуд-тракі.
Для аўтамабілістаў праектуюць шматузроўневы гараж-стаянку на 1620 машынамесцаў.
Калі пачнецца будаўніцтва «Кантыненталя», пакуль невядома. Аднак дамовы долевага будаўніцтва пачнуць заключаць ужо заўтра, на сайце bir.by ужо з'явіліся цэннікі.
Можна выбраць апартаменты рознай плошчы — ад 26 да 129 квадратных метраў. Усе памяшканні будуць здавацца ў фармаце опенспэйс, гэта значыць без перагародак. Дзяліць прастору на пакоі трэба будзе самому ўласніку.
Так, напрыклад, за апартаменты на другім паверсе памерам 26 квадратных метраў забудоўшчык просіць €39 585 па курсе. За 46 «квадратаў» на тым жа паверсе — €67 145 у эквіваленце. Апартаменты плошчай 126 «квадратаў» на трэцім узроўні абыдуцца ўжо ў €170 316 па курсе.
Каментары