Пяткевіч: Сацыяльная сфера — яшчэ і эканоміка. А ў культуры людзі хацелі б, каб было, як у іншых краінах
Сацыяльная сфера — гэта не проста адукацыя, ахова здароўя, культура, а велізарная эканоміка. Аб гэтым заявіла журналістам намеснік прэм’ер-міністра Наталля Пяткевіч, піша БелТА.
Раней Наталля Пяткевіч займала пасаду першага намесніка кіраўніка Адміністрацыі Лукашэнкі. У якасці віцэ-прэм’ера яна будзе курыраваць сацыяльны блок пытанняў.
Наталля Пяткевіч сказала, што гэта прызначэнне стала для яе нечаканым.
«Гэта чэлендж, пэўны выклік, таму што
гэта не проста сацыяльная сфера (адукацыя, ахова здароўя, культура) — гэта велізарная эканоміка. Лукашэнка паставіў вялікія задачы і ўскладае вялікія надзеі на выніковасць, — заявіла віцэ-прэм’ер.
— Сацыяльны блок — гэта самае галоўнае для нашых людзей. У сацыяльна арыентаванай дзяржаве і з улікам тых патрабаванняў, якія агучвае Лукашэнка ў частцы абароны інтарэсаў нашых грамадзян, гэта, вядома, найважнейшая тэма».
Паводле слоў Наталлі Пяткевіч, сацыяльная сфера — няпростая. Тут ёсць як аб’ектыўныя прычыны, так і суб’ектыўныя. Так, грамадзяне імкнуцца да больш высокага ўзроўню жыцця і маюць адпаведныя чаканні ад улады.
Рэалізацыя задуманага, вядома, патрабуе ўкаранення інавацый, а значыць — і вялікіх выдаткаў.
«З другога боку, калі мы гаворым, напрыклад, пра ахову здароўя, існуюць пэўныя аб’ектыўныя тэндэнцыі ў свеце: старэнне насельніцтва, павелічэнне працягласці жыцця, запатрабаванасць медыцынскіх паслуг. Узнікаюць і праблемы: недахоп кадраў, павелічэнне фінансавання і гэтак далей. Таму ў частцы аховы здароўя трэба будзе ўсё скамбінаваць: і патрабаванні кіраўніка дзяржавы, і аб’ектыўныя ўмовы,
і ўсе напрацоўкі, каб ахова здароўя ў нашай краіне, як заўсёды, была на вельмі высокім узроўні», — сказала намеснік прэм’ер-міністра.
Пэўныя чаканні і прэтэнзіі ёсць і да сферы культуры. Тым больш, беларусы бачаць, як развіваецца гэтая галіна ў іншых краінах, і ім ёсць з чым параўнаць. «Нашай краіне трэба адпавядаць», — падкрэсліла Наталля Пяткевіч.
Дамагчыся высокіх вынікаў неабходна і ў спорце, дадала яна. Акрамя таго, важна прывіваць грамадзянам любоў да фізічнай культуры.
«Усё гэта трэба ўмясціць у тыя эканамічныя рэаліі, якія існуюць і ў свеце, і ў нашай краіне. Самае галоўнае патрабаванне — гэта павышэнне эфектыўнасці дзяржаўнага кіравання ў цэлым, у тым ліку і ў сацыяльным блоку», — рэзюмавала віцэ-прэм’ер.
Каментары
Датычныя да азначаных сфер дзейнасці - свідрўйце ў паясах новыя дзіркі.