Маршрутчыка, які падмануў гаротных жанчын на 68 тысяч рублёў, асудзілі на чатыры гады
Ён прадстаўляўся пасажыркам святаром, у якога ў аўтакатастрофе загінула ўся сям'я.
Гісторыя пачалася яшчэ ў 2016 годзе. 48-гадовы жыхар Маладзечанскага раёна працаваў кіроўцам маршрутнага таксі па маршруце Мінск — Нясвіж — Клецк — Сіняўка.
У працэсе працы ён знаёміўся з жанчынамі-пасажыркамі, прадстаўляючыся былым святаром, распавядаў пра трагічную гібель сваёй сям'і ў аўтакатастрофе і сваю «пашыраную місію» — дабрачынную дзейнасць у дзіцячым хоспісе ў Бараўлянах.
Пасля знаёмства ён працягваў кантакты ў віртуальнай прасторы, прызнаваўся ў каханні і прасіў грошы на «пахаванне дзіцяці з хоспіса», «аперацыю бацькі ў Германіі» або «рэабілітацыю ў Маскве».
Адна з ахвяр, жанчына з мужам-інвалідам і двума непаўналетнімі дзецьмі, страціла больш за 16 тысяч даляраў. Іншая аддала ўсе свае зберажэнні — 7500 даляраў — на «рамонт аўтамабіля».
Трэцяя жанчына аформіла на сваё імя крэдытную карту «Халва» і перадала яе зламысніку. Ён карыстаўся грашыма, абяцаў папоўніць рахунак, але не рабіў гэтага. Ахвяры былі вымушаны ўзяць новыя крэдыты, каб разлічыцца з банкам.
Мужчына таксама выкарыстаў давер адной з жанчын, ведаючы яе былога сужыцеля, і выдумаў гісторыю пра яго нібыта цяжкае фінансавае становішча. Ён пераканаў жанчыну сабраць і перадаць яму вялікую суму грошай, якую ён выкарыстаў не для дапамогі, а як задатак за дом, які збіраўся набыць у гэтага сужыцеля.
Яшчэ адна жанчына ўзяла крэдыт на 5800 рублёў, каб ён адкрыў свой маршрут і набыў мікрааўтобус. Першапачаткова ён плаціў працэнты, але потым знік.
У выніку пяць жанчын звярнуліся ў міліцыю, а маршрутчык уцёк. Аднак у снежні 2024 года яго затрымалі супрацоўнікі ДАІ падчас праверкі дакументаў.
У агульным ён атрымаў ад ахвяр больш за 68 тысяч рублёў. Грошы былі выдаткаваны на арэнду камфартабельнага жылля, куплю дарагіх гаджэтаў, абслугоўванне прэстыжнага аўтамабіля і бязбеднае існаванне.
У дачыненні да яго заведзена крымінальная справа па ч. 4 арт. 209 УК (махлярства ў асабліва буйным памеры). У судзе ён цалкам прызнаў віну і раскаяўся.
Суд прызначыў яму пакаранне — чатыры гады калоніі.
Цяпер чытаюць
Палітвязень расказаў, як звычайныя крымінальнікі аб’явілі галадоўку, каб палепшыць умовы ўтрымання палітычных3
Каментары