Беларускі пачалі флэшмоб — посцяць свае фоты ў кароткіх шортах. Прычынай стаў адзін непрыемны каментар
Жанчыны вырашылі абараніць права адна адной не хаваць ногі.
Усё пачалося з паста ў Threads, які пакінула карыстальніца пад нікам jablynevy.kvecen. Беларуска сустрэла сталую жанчыну ў шортах, і яе гэта так абурыла, што яна не змагла змаўчаць:
«Я, канешне, усё разумею: лета, спёка даўгачаканая. Але выбачце: нашто цёцям 60+ кароткія шорты? Куды? Шчыра, мне не дужа прыемна на такое глядзець, асабліва як там варыкоз які, тонусу няма.
Першы раз такое дзіва бачыла, ды яшчэ такія кароткія. Відаць, дачніца нейкая сталічная. Да юных дзяўчат на выданні у такім стылі пытанняў няма».
Публікацыя жанчыны менш чым за суткі атрымала амаль 300 каментароў. Толькі некалькі з іх былі ў падтрымку аўтаркі паста, усе астатнія — у падтрымку невядомай жанчыны ў шортах.
Аўтарцы раілі, калі ёй непрыемна бачыць такіх жанчын, заплюшчыць вочы і не глядзець на іх, а таксама адзначалі, што яна чамусьці не піша пра варыкоз і адсутнасць тонусу на мужчынскіх нагах:
«Едзе сабе жанчына па сваіх справах, а тут нейкая пра яе варыкоз піша ў сеціве — вось гэта культура».
«Усе ведаюць: пасля 40 кабеты павінны закруціцца ў мяшок ды паўзці на могілкі. А то навыдумлялі тут шорты нейкія насіць, сапраўды!»
«Даю бясплатную параду: не выходзьце з дому да зімы! І ў ніякім выпадку не хадзіце на рэчку ці на возера купацца — там людзі 60 гадоў ходзяць зусім без вопраткі, гэткі жах!»
Каментарамі справа не скончылася, і беларускі пачалі публікаваць уласныя фоты ў шортах.
Адна жанчына прызналася, што ў яе праблемы з венамі пачаліся зусім не ў 60, а нашмат раней, але гэта не перашкаджае ёй насіць тое, што хочацца:
«У мяне ніколі не было худых ног, варыкоз з 12 гадоў. Колькі брыдоты я слухала і чую да гэтага моманту ў свой адрас! У лістападзе быў нервовы зрыў, бо я зноў не такая. Дзякуй мужу, які дапамог гэта перажыць. Часам стараюся схуднець, але потым набіраю вагу зноў.
Сумна, што колькі заўгодна можна пісаць пра душу і характар, але знойдуцца людзі, якія заўсёды скажуць нешта злое за спіной. Дзякуй, беларускі трэдс, што заступіліся за незнаёмую шасцідзесяцігадовую кабету ў кароткіх шортах!»
Іншая беларуска адзначыла, што кароткія шорты — далёка не адзіная рэч, якую варта дазволіць адна адной:
«Дык што рэабілітуем наступным? Басаножкі з адкрытымі пальцамі? Адкрытыя плечы? Можа, белыя штаны, якія «таўсцяць»? Або купальнікі пасля 40?
Ці правіла «рукі трэба хаваць пасля пэўнага ўзросту»? А можа, калені? О, бедныя жаночыя калені таксама не раз траплялі пад раздачу. Увогуле, чым даўжэй жыву, тым больш здзіўляюся, колькі комплексаў нам паспелі навязаць».
Блогерка Кацярына Хольцапфэль-Варажун разважае, які мусіць быць падыход да знешнасці іншых:
«Калі не разглядваць так дэтальна іншых людзей, а больш увагі звяртаць на тое, што я думаю пра саму сябе — мне здаецца, ад гэтага будзе больш карысці і больш прыемнасці».
Аўтарка паста, з якога ўсё пачалося, здаецца, ужо гатовая пагадзіцца з аматаркамі шортаў — і нават не супраць запосціць фота ў іх:
«Не, ну, раз пайшла такая пляска, то хоць ты сама ідзі ды купі кароткія джынсавыя шорты, што спадабаліся з першага погляду».
«Наша Нiва» — бастыён беларушчыны
ПАДТРЫМАЦЬ
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары
Падтрымліваю каментар!