«Гэта не план міру, а тэатр». Зяленскі адхіліў прапанову Расіі пра трохдзённае перамір’е
Прэзідэнт Украіны Уладзімір Зяленскі раскрытыкаваў ініцыятыву Крамля аб «гуманітарным перамір’і» з 7 па 9 мая, назваўшы яе тэатралізаванай пастановай, непрыдатнай для рэальнага спынення вайны. Украінскі лідар настойвае на паўнавартасным перамір’і прынамсі на 30 дзён.
Падчас размовы з журналістамі Зяленскі заявіў, што «гульня Пуціна ў гуманітарную місію» звязаная выключна з датай — 7 мая 25 гадоў таму ён стаў прэзідэнтам Расіі, і цяпер спрабуе скарыстаць перамір’е для свайго іміджу і выхаду з ізаляцыі перад святкаваннямі 9 мая.
Таму, як падкрэсліў Зяленскі, прапановы Расіі — гэта хутчэй тэатральная пастаноўка, бо немагчыма за два-тры дні пабудаваць які-небудзь план наступных крокаў па спыненні вайны.
«Гуляць на тое, каб стварыць Пуціну мяккую атмасферу для выхаду з ізаляцыі 9 мая, і каб усім было камфортна і бяспечна — тым лідарам, ці сябрам Пуціна, ці партнёрам, якія прыйдуць на Крамлёўскую плошчу па той ці іншай прычыне 9 мая, — ніхто Пуціну дапамагаць не будзе. Мы проста альбо ваюем, альбо Пуцін паказвае, што гатовы да спынення агню, да першай часткі заканчэння вайны. Мы гатовыя пачаць з 1, з 3, з 5. Калі яму патрэбна дата 7, нам усё роўна. Ад 7 — 30 дзён», — сказаў Зяленскі.
Зяленскі падкрэсліў, што за тры дні немагчыма ўзгадніць ніякіх рэальных крокаў да заканчэння вайны, таму такая ініцыятыва выглядае несур’ёзна.
Ён адзначыў, што ЗША прапанавалі мадэль безумоўнага спынення агню, і Украіна яе падтрымлівае. Паводле яго слоў, перамір’е мае доўжыцца не менш за месяц.
«Калі Расія сапраўды гатовая да міру, няхай падтрымлівае 30-дзённую ініцыятыву. Усё астатняе — проста спроба зрабіць камфортныя ўмовы для Пуціна і яго гасцей на 9 мая», — сказаў прэзідэнт.
Зяленскі таксама падкрэсліў, што без якаснага міжнароднага маніторынгу дасягнуць «поўнай цішыні» на фронце немагчыма. Ён нагадаў, што і пасля 2014 года стральба не спынялася цалкам нават падчас перамір’яў.
Таксама Зяленскі заявіў, што Украіна не можа гарантаваць бяспеку сусветных лідараў, якія прыедуць у Маскву на парад 9 мая. «Мы не можам несці адказнасць за тое, што адбываецца на тэрыторыі Расіі», — сказаў ён.
Цяпер чытаюць
Хто такі Міхаіл Мяховіч — сілавік, які вядзе канал ГУБАЗіКа і адказвае за прабіў людзей5
Каментары