У сакавіцкім абнаўленні Telegram з'явіліся новыя функцыі, якія дазваляюць публічным асобам і аўтарам кантэнту кантраляваць уваходныя паведамленні і манетызаваць сваю папулярнасць. Пра гэта паведаміла прэс-служба Telegram.
Цяпер карыстальнікі могуць зрабіць перапіску з незнаёмцамі платнай, атрымліваючы за гэта зоркі Telegram. Гэта не толькі абараняе ад спаму, але і дазваляе манетызаваць сваю ўвагу.
Дадаткова ў новых чатах цяпер адлюстроўваецца інфармацыя пра суразмоўцу, уключаючы яго краіну, дату рэгістрацыі і агульныя групы. Гэта дапаможа хутчэй распазнаваць ашуканцаў і пазбягаць непажаданых кантактаў.
Таксама зоркі Telegram цяпер можна выкарыстоўваць для аплаты падпіскі Telegram Premium і выводзіць праз платформу Fragment. Уладальнікі суполак атрымалі магчымасць кіраваць балансам зорак, а бізнэс — дадатковыя зніжкі на адпраўку праверачных кодаў праз Telegram Gateway.
Акрамя таго, карыстальнікі Android цяпер могуць трансляваць відэа на Chromecast, а ў профілях з'явілася функцыя замацавання падарункаў.
Каментары