Нарвегія можа выдзеліць мільярды еўра на падтрымку Украіны з найбуйнейшага ў свеце суверэннага фонду

Нарвегія разглядае магчымасць выкарыстання свайго суверэннага фонду для рэзкага павелічэння падтрымкі Украіны на фоне прыкмет аслаблення вайсковай падтрымкі з боку ЗША.

Гэтая краіна валодае найбуйнейшым у свеце суверэнным фондам памерам у 1,7 трыльёна еўра, уключаючы ацэначныя 109 мільярдаў еўра прыбыткаў ад павышэння цэн на газ у 2022 і 2023 гадах.

Да гэтага часу Нарвегія выдаткавала толькі 3,35 мільярда еўра на падтрымку Украіны — суму, якую рэдактары вядучых шведскіх і дацкіх газет назвалі «ганебнай» і «вартай жалю». Паводле тых жа даных, Данія выдзеліла 5,41 мільярда еўра, а Швецыя — 8,05 мільярда.

«Нарвегія — адна з нямногіх краін, якая мае значныя фінансавыя рэсурсы, і таму мы павінны неадкладна памножыць нашу падтрымку Украіны», — заявіла ў суботу лідарка апазіцыйнай Ліберальнай партыі Нарвегіі Гуры Мелбі.

Былая кансерватыўная прэм'ер-міністарка Нарвегіі Эрна Сульберг заявіла, што падтрымка павінна быць павялічаная «значна» і «хутка».

«Урад можа з упэўненасцю меркаваць, што ў парламенце ёсць воля да выдзялення дадатковых сродкаў», — заявіла яна.

Ліберальная партыя і Сацыялістычная левая партыя заклікалі да тэрміновага пасяджэння парламента, але, як стала вядома Euractiv, яны цяпер чакаюць прапановы ўрада.

«Нарвегія ўваходзіць у лік найбуйнейшых донараў Украіны. Мы ўжо абавязаліся выдзеліць як мінімум NOK 167 мільярдаў крон (14,7 мільярда еўра) на падтрымку да 2030 года,» — паведаміў Euractiv прэс-сакратар Міністэрства замежных спраў.

«Мы хутка прадставім прапанову аб павелічэнні падтрымкі Украіны для парламента» — сказаў прэм'ер-міністр краіны Ёнас Гар Сцёрэ, які браў удзел у нядаўняй сустрэчы еўрапейскіх лідараў у Лондане.

Ідэя больш актыўнага выкарыстання фонду для падтрымкі Украіны і еўрапейскіх абарончых выдаткаў набірае папулярнасць у Нарвегіі.

Адной з прапаноў з'яўляецца канверсія прыкладна €300 мільярдаў з €450 мільярдаў у ліквідных аблігацыях фонду ў еўрапейскія абарончыя аблігацыі з умовай, што грошы будуць выкарыстоўвацца выключна для развіцця абароны Еўропы.

З 2001 года Нарвегія строга прытрымліваецца бюджэтнага правіла, якое дазваляе выдаткоўваць не больш за 4%, а потым 3% свайго суверэннага фонду кожны год. Правіла было ўведзена пры шырокай міжпартыйнай падтрымцы тады, калі прэм'ер-міністрам краіны быў Енс Столтэнберг, які ў 2014-2024 гадах займаў пасаду генеральнага сакратара НАТА.

Цяпер Столтэнберг займае пасаду міністра фінансаў Нарвегіі і ён папярэдзіў адносна небяспекі парушэння бюджэтнага правіла. «Гэта небяспечная ідэя — парушаць бюджэтнае правіла, каб выдзеліць больш грошай для Украіны», — сказаў ён 7 лютага.

Міністэрства замежных спраў Нарвегіі адмовілася даць дадатковыя каментары наконт таго, наколькі яно хоча павялічыць дапамогу, спаслаўшыся на заяву Сцёрэ.

«Усе астатнія палітыкі, якія мы праводзім, заснаваныя на тым, што мы свабодная і незалежная краіна, і што ў нас ёсць функцыянуючы міжнародны парадак,» — сказаў міністр замежных спраў Эспен Барт Эйдэ.

• 10
• 0
• 1
• 0
• 0
• 0
• 0
• 0