Самалёт расійскай авіякампаніі зламаўся падчас рэйса. Ён такі ўжо чацвёрты з пачатку года
У маскоўскім аэрапорце «Унукава» экстранна прызямліўся самалёт расійскай авіякампаніі UTair, які выконваў рэйс Масква — Дубай. Гэта другі падобны выпадак з бартамі UTair за адзін тыдзень і ўжо чацвёртая паломка лайнераў расійскіх авіякампаній з пачатку 2025 года, піша The Moscow Times.
Як расказалі ў авіякампаніі UTair, прычынай экстраннага вяртання самалёта стала «змена ўзроўню гідраўлічнай вадкасці».
Паводле даных сэрвісу Flightradar24, борт развярнуўся ў раёне Баку і накіраваўся назад у Маскву. На ім знаходзіліся 240 пасажыраў, ніхто з іх не пацярпеў.
Дагэтуль з пачатку года, які толькі пачаўся, з расійскімі самалётамі ўжо былі зафіксаваныя тры падобныя выпадкі.
7 студзеня лайнер Boeing 737 авіякампаніі UTair, які ляцеў з Санкт-Пецярбурга ў Самарканд, таксама быў вымушаны прызямліцца ў аэрапорце «Унукава» з-за няспраўнасці. А 4 студзеня адразу два расійскія самалёты сутыкнуліся з тэхнічнымі праблемамі падчас рэйсаў: Airbus A321neo авіякампаніі «Уральскія авіялініі», які выконваў рэйс з Шарм-аль-Шэйха ў Екацярынбург, вярнуўся ў аэрапорт вылету; Boeing 737 авіякампаніі NordStar, які рухаўся маршрутам Валгаград — Екацярынбург, таксама быў вымушаны перапыніць палёт.
Пасля расійскага ўварвання ва Украіну ў 2022 годзе заходнія краіны ўзмацнілі санкцыйны ціск на Расію, які ў значнай ступені закрануў авіяцыйную галіну. Да канца 2024 года колькасць авіяцыйных здарэнняў у Расіі дасягнула антырэкорду: за 11 месяцаў было зафіксавана 208 авіяцыйных здарэнняў, што на 30% больш, чым за аналагічны перыяд 2023 года. Гэта самы высокі паказчык за апошнія шэсць гадоў.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2828
Каментары