Стала вядома, колькі афіцэраў у беларускае войска сёлета прызвалі з запасу
Ваенкам Гродзенскай вобласці Вячаслаў Раманенка раскрыў інфармацыю аб колькасці афіцэраў запасу, якіх у гэтым годзе мелі прызваць на службу, заўважыў «Беларускі Гаюн».
Па словах ваенкама Гродзенскай вобласці, на 2024 год быў вызначаны план прызыву 1000 афіцэраў запасу. З падначаленай яму Гродзенскай вобласці было прызвана 138 чалавек.
Такім чынам, канстатуе «Беларускі Гаюн», у 2024 годзе ў беларускае войска планавалі прызваць столькі афіцэраў запасу, колькі дагэтуль прызывалася сумарна за перыяд з 2016 па 2023 гады. Ці ўдалося ваенкаматам сёлета выканаць гэты амбіцыйны план — не паведамлялася.
Афіцыйна прычынамі прызыву афіцэраў запасу называецца дзве:
1) павышэнне ўзроўню ўкамплектаванасці першасных пасад афіцэрскага складу (закрыць «кадравыя дзіркі»);
2) забеспячэнне падрыхтоўкі мабілізацыйнага рэзерву (даць магчымасць дрэнна падрыхтаваным выпускнікам ваенных кафедраў атрымаць практычны вопыт).
Да пералічаных прычын, на думку «Беларускага Гаюна», можна дадаць яшчэ адну — стварэнне кадравага рэзерву для падраздзяленняў, Паўднёвага аператыўнага камандавання, якое цяпер фарміруецца.
Указ Лукашэнкі №179 «Аб прызыве афіцэраў запасу на вайсковую службу» быў апублікаваны ў канцы красавіка 2024 года. Дакументам прадугледжваўся прызыў у 2024 годзе на службу ва УС РБ і памежную службу афіцэраў запасу, якія скончылі вайсковую кафедру і не прайшлі тэрміновую службу.
Асаблівасцю дакумента стала тое, што колькасць прызваных афіцэраў была засакрэчаная. Гэта другі падобны выпадак (першы быў у 1994 годзе) у гісторыі суверэннай Беларусі.
Цяпер чытаюць
Мінчанка Ангеліна, якая прасіла ў Лукашэнкі кватэру за тройню, атрымала жыллё26
Каментары