Уражаньні ад канцэрту 25 жніўня сапсавала забарона ўздымаць бел-чырвона-белыя сьцягі.
Хачу распавесьці пра свае ўражаньні ад канцэрту "За Свабоду" 25 жніўня. "Сьвята як сьвята: цыгарэты, піва..." Колькі ні прасілі арганізатары аб неўжываньні алькаголю — усё роўна сустракаліся купкі маладзёнаў зь півам у руках. Прасілі, каб не ўздымалі Сьцягоў, але мы вырашылі пад канец канцэрту на выступе N.R.M. падняць... і паднялі. Да нас адразу падляцелі "дружыньнікі" з "Моладзі БНФ" і папрасілі іх прыбраць, матывуючы тым, што арганізатары будуць за тое пакараныя, як на Чарнобыльскім Шляху 2006. Але пагаджаліся з тым, што гэта Наш Сьцяг, і сыходзілі. Праз хвілінаў пяць да нас ізноў падбеглі некалькі чалавек і паспрабавалі адабраць Штандары і гаварылі па-расейску, на што атрымалі адказ: "Едзьце ў Маскву! Вы дзе жывяце? Хавайцеся ў бульбу!" Потым цэлай калодай наляцелі на аднаго з салігорскіх хлопцаў і пачалі з ужываньнем фізычнай сілы адбіраць Сьцяг, але пралічыліся і атрымалі ў адказ... Падчас сутычкі нехта з "дружыньнікаў" пасьпеў цішком забраць і схаваць Палотнішча, але хлопцу Яго потым вярнулі. Знайшліся таксама людзі, якія падтрымалі нас. Урэшце, настрой быў сапсаваны. Хацелася б выказацца адносна "арганізатараў" і "дружыны". Калі вы хочаце арганізаваць сапраўднае Сьвята Незалежнасьці, то ня трэба дрыжаць за сваю пятую кропку ці не бярыцеся ўвогуле. Бо з такім посьпехам я ўключу дома дыск "Песьні Свабоды" і буду махаць Сьцягам. Сорамна, калі не ПМСН, а "свае людзі" адбіраюць наш Сьцяг! Для чалавека, які прайшоў Плошчу, разгоны, пагрозы і допыты — гэта па меншай меры абраза!!! За100емся!
Глеб, Салігорск
Ад Рэдакцыі: Вось як тлумачаць сытуацыю арганізатары канцэрту на сайце za-svabodu.org Адмоўны момант канцэрту — "сьцяговы шантаж" з боку міліцыі. Зьвязаны ён быў ня гэтулькі з магчымымі затрыманьнямі, як паведамілі СМІ, а з тым, што міліцыянты "ўзялі ў закладнікі" электрычнасьць. Сярод арганізатараў не было адназначнага меркаваньня: ці ісьці на прынцыповую канфрантацыю і спыняць канцэрт, ці працягваць яго. Аднак пасьля кансультацыяў з музыкамі, якія нячаста маюць магчымасьць выступіць перад публікай, было прынятае рашэньне — "сьцягі на плечы", г.зн. не выкарыстоўваць тронкаў, а накідваць нацыянальную сымболіку на сябе альбо трымаць у руках.
Шкада, але гэта відавочна не праблема канцэрту, а праблема ўсёй нашай краіны. І для ўсіх нас гэта мусіць стаць дадатковым стымулам для барацьбы супраць антысвабоднай і процібеларускай улады ў Беларусі.
Каментары