З мілай жывёлінай малююць арты, ствараюць мемы і розны мерч. Але шалёная папулярнасць стварыла і небяспеку для яе.
10 ліпеня 2024 года ў карлікавых бегемотаў Джона і Тоні, якія жывуць у тайландскім заапарку Каа Кхеоу ў горадзе Сірача, нарадзілася маленькая самачка. Па выніках апытанкі, у якой прагаласавалі 20 тысяч чалавек, ёй далі імя Му-Дэнг, што можна перакласці з тайскай мовы як «жвавая свінка».
І сапраўды, Му-Дэнг аказалася вельмі гарэзлівым і пацешным бегемотам. Наглядчык заапарка Атапал Нанды стаў рэгулярна дзяліцца ў сацсетках фота і відэа таго, як бегемоцік дурэе, носіцца па вальеры, але не заўсёды дае рады гравітацыі, робіць «кусь» за каленку наглядчыка, аказвае адчайны супраціў пры спробе яе пакупаць і шалее ад струменю вады. У любой сітуацыі бегемоцік выглядае вельмі экспрэсіўным і эмацыйным.
Му-Дэнг імгненна стала любіміцай інтэрнэту. Яе пацешнасць, няўклюднасць і бясшкодная агрэсіўнасць замілавалі ўсіх. Многія пазналі ў мілай жывёле з вылупленымі вачыма і шырока разяўленай бяззубай пашчай сваю ўнутраную рэакцыю на любыя жыццёвыя выклікі.
Сацсеткі запаланілі фотаздымкі, відэа, мемы і арты з карлікавым бегемотам. Заапарк нават вырашыў прадаваць адзенне і іншыя тавары з выявай Му-Дэнг.
Папулярнасць бегемоціка дазволіла заапарку ўпершыню за дзесяць гадоў павысіць кошт білетаў. Рост коштаў, насуперак асцярог персанала і адміністрацыі, не прывёў да падзення наведвальнасці. Наадварот, ён дапамог дастаткова разбагацець, каб пакрываць большую частку выдаткаў на ўтрыманне жывёл самастойна і не мець патрэбы ў знешняй падтрымцы.
Але папулярнасць таксама стала пагрозай для жывёлы. Наведвальнікі сталі паводзіць сябе агрэсіўна, кідаючы ў Му-Дэнг малюскаў і спрабуючы выліць на яе ваду, каб прыцягнуць увагу карлікавага бегемота і справакаваць на мемную рэакцыю. Заапарк вымушаны быў усталяваць дадатковыя камеры відэаназірання вакол вальера, а ўсім наведвальнікам, якія пагражаюць бяспецы жывёл, прыгразілі судом. Акрамя таго, каб задаволіць вялікую колькасць наведвальнікаў, для іх быў уведзены пяціхвілінны ліміт на тое, каб пабачыць Му-Дэнг.
Карлікавыя бегемоты, якія сёння жывуць у Ліберыі, Сьера-Леонэ і Кот-д’Івуары, знаходзяцца пад пагрозай вымірання. Разам са звычайнымі бегемотамі, якія раней насялялі большую частку Афрыкі, ліберыйскія карлікавыя бегемоты з’яўляюцца адзіным відам сямейства, які дажыў да нашага часу. Яшчэ ў XX стагоддзі навукоўцы лічылі, што бегемотавыя — найбліжэйшыя сваякі свінняў. Але найноўшыя генетычныя даследаванні паказалі, што гэта зусім не так, бегемотавыя — найбліжэйшыя наземныя сваякі кітоў.
«Наша Нiва» — бастыён беларушчыны
ПАДТРЫМАЦЬЦяпер чытаюць
Хто той рэдактар беларускай Вікіпедыі, якога пасадзілі на два гады за «дыскрэдытацыю Беларусі»7
Каментары