Шон Бін, Ума Турман, Пірс Броснан, — пастараніцеся. У фільме «Персі Джэксан і выкрадальнік маланак» Галівуд рыхтуе новых бажкоў.
Персі Джэксан і выкрадальнік маланак (Percy Jackson & the Olympians: The Lightning Thief)
ЗША — Канада, 2010, каляровы, 120 хв.
Рэжысёр: Крыс Каламбус
Ролі выконваюць: Логан Лерман, Брэндан Т.Джэксан, Аляксандра Дадарыё, Шон Бін, Пірс Броснан, Ума Турман, Стыў Куган, Разарыя Доўсан, Джэйк Эйбел,Кевін МакКід
Жанр: Падлеткавыя прыгоды паводле раману Рыка Рыордана
Адзнака: 4,5 (з 10)
Персі Джэксан — звычайны амерыканскі падлетак — і пазашлюбны сын бога Пасейдона. Алімпійскія калегі бацькі абвінавачваюць хлопца ў выкраданні маланак і пагражаюць знішчыць свет, калі пакража не будзе вернутая. У кампаніі з дачкою Афіны і гарэзлівым сябрам-сатырам, падлетак адпраўляецца ў прыгоды па Злучаным Штатам, каб сустрэцца з Медузай Гаргонай, Лернейскаю гідрай і злобным Аідам-панкушаю.
Карціна Крыса Каламбуса — даведнік па грэцкім міфам, прыстасаваны для пачатковых класаў амерыканскай школы. «Дзеткі — гэта фурыя. У кентаўра — конскі азадак, у сатыра — казліныя ногі. А Лернейская гідра — вялікая бяка.» Фурыя пры гэтым — настаўніца ангельскай літаратуры, кентаўр — Пірс Броснан у інваліднай калясцы, а сатыр — афраамерыканец. Ума Турман дэманструе змяіныя «гаргонаўскія» валасы, Логан Лерман лётае ў крылатых кедах, школьная асадка пераўтвараецца ў меч.
І ўжо не здзіўляе, што Алімп месціцца на амерыканскім хмарачосе, а ўваход у Аід — пад Галівудам.
Але галоўная мэта фільму — зусім не дыдактычная. Стужка — дзіцячы садок для новых галівудскіх багоў: Логана Лермана, Аляксандры Дадарыё, Джэйка Эйбела. Яны пакуль шыхтуюцца ў летнім лагеры і граюць у ролевыя гераічныя гульні. Шон Бін, Ума Турман, Пірс Броснан, — пастараніцеся.
Падступны Галівуд ужо рыхтуе вам змену.
Цяпер чытаюць
Васкрасенскі: Адкрываецца неба — і Алесь Бяляцкі адразу выходзіць29
Каментары