Легіён «Свабода Расіі» заявіў, што ўзяў пад кантроль пасёлак Цёткіна ў Курскай вобласці. Што вядома пра атаку на Расію

Ранкам у сацсетках з'явіліся паведамленні ад расейскіх «ваенкараў» пра спробы ўзброеных груп з бранятэхнікай прарвацца пры падтрымцы артылерыі ўглыб расійскай тэрыторыі, у прыватнасці, у Белгародскай вобласці. 

Затым у сацсетках з'явіліся заявы байцоў легіёна «Свабода Расіі», Сібірскага батальёна, а пазней і Рускага добраахвотніцкага корпуса.

Яшчэ на некалькіх відэа паказаны, імаверна, пераход расійска-ўкраінскай мяжы, заход ДРГ у расійскае сяло, стралковы бой і знішчэнне расійскага бронетранспарцёра.

Прадстаўнік галоўнага ўпраўлення разведкі Мінабароны Украіны Андрэй Юсаў назваў баявыя дзеянні на тэрыторыі Расіі «верагоднай спецаперацыяй расійскіх добраахвотніцкіх батальёнаў».

«Легіён «Свабода Расіі», РДК і Сібірскі батальён на тэрыторыі Расіі дзейнічаюць як самастойныя падраздзяленні, паколькі складаюцца з грамадзян Расіі. Яны ўрэшце рэшт знаходзяцца ў сябе дома. Верагодна, цяпер адбываецца сумесная аперацыя гэтых падраздзяленняў на тэрыторыі так званай РФ», — заявіў Юсаў.

Мінабароны Расіі пацвердзіла спробу прарыву УСУ адразу на чатырох напрамках — з боку Харкаўскай вобласці, белгарадскіх вёсак Нехацееўка і Спадарушына, а таксама курскага Цёткіна. Аднак усе атакі былі адбітыя, заявілі расійскія вайскоўцы. 

ФСБ Расіі прывяло ўражальныя даныя аб стратах украінскіх фарміраванняў: «Знішчана звыш 100 чалавек жывой сілы суперніка, шэсць танкаў, САУ Caesar, 20 баявых браніраваных машын, апорны пункт». 

Фота ці відэа ні Мінабароны Расіі, ні ФСБ не паказвала.

Каля 14:30 легіён «Свабода Расіі» заявіў, што ўзяў пад кантроль пасёлак Цёткіна ў Курскай вобласці — нібыта расійскія войскі пакінулі пазіцыі і ўцяклі. 

Па версіі Мінабароны РФ і ФСБ, усе атакі і спробы пранікнуць на тэрыторыю Расіі былі адбітыя.

У той жа час ранкам адбылася магутная атака дронаў на расійскія рэгіёны. У ноч на 12 сакавіка як мінімум восем расійскіх рэгіёнаў былі атакаваны ўкраінскімі беспілотнікамі. Аб атаках паведамілі ўлады Белгарадскай, Варонежскай, Курскай, Маскоўскай, Арлоўскай, Тульскай, а таксама Ленінградскай і Бранскай абласцей.

Дрон урэзаўся ў будынак мэрыі Белгарада. Пры атацы пацярпелі два чалавекі.

Беспілотнікам выведзены са строю Ніжагародскі НПЗ.

Ніжагародскі НПЗ у Кстоўскай прамзоне — чацвёрты па аб'ёме перапрацоўкі ў Расіі. На яго прыпадае каля 11% усяго бензіну ў краіне.

Усе гэтыя падзеі адбываюцца напярэдадні прэзідэнцкіх выбараў у Расіі, што пройдуць на гэтым тыдні. 

• 45
• 0
• 8
• 2
• 1
• 1
• 3
• 0