На Ксенію Салей уся краіна звярнула ўвагу напрыканцы мінулага году. Тады на традыцыйным навагоднім балі 20-гадовую прыгажуню пасадзілі побач з Лукашэнкам. Зараз яна апублікавала ў сторыс у інстаграме фота заручальнага пярсцёнка пасярод чырвоных ружаў з подпісам: «Ну вось неяк так».
Дарэчы, Ксенія вельмі ганарылася той роляй, якую ёй давялося сыграць на праўладным свяце. У мінулым снежні студэнтка запосціла здымак, які пракаментавала так: «Вось такая вось віп-ложа (у мінулай гісторыі хацела паказаць, што я крутышка такая сядзела з прэзідэнтам). Пахвалілася, можна зноў уцякаць з інстаграма на нявызначаны тэрмін».
Потым дзяўчына тлумачыла «Гродзенскай праўдзе», у якой сама падпрацоўвае (Ксенія вучыцца на 4 курсе факультэта гісторыі камунікацыі і турызма Гродзенскага дзяржаўнага ўніверсітэта імя Янкі Купалы), як трапіла ў Палац Незалежнасці:
− Сяджу на занятках − і раптам мне тэлефануюць з упраўлення выхаваўчай працы з моладдзю, кажуць, што маю кандыдатуру вылучаюць для ўдзелу ў рэспубліканскім балі. Я, вядома, пагадзілася. Але не ведала, паводле якіх крытэрыяў выбіралі ўдзельнікаў. Для мяне вялікай нечаканасцю было, што мяне ўсё ж зацвердзілі.
Але дазволім сабе ўсумніцца ў шчырасці здзіўлення дзяўчыны з мадэльнай знешнасцю. Нягледзячы на юны ўзрост, яна ўжо паспела вызначыцца ў барацьбе на ідэалагічным фронце. Напрыклад, летась разам з іншымі студэнтамі зняла 15-хвілінны дакументальны фільм «Армія Краёва: кошт здрады».
Наколькі гэта прапагандысцкая праца, можна зразумець па адной цытаце пракурора Гродзенскай вобласці Аляксандра Жукава:
− Гэты праект быў задуманы для таго, каб данесці да маладога пакалення, укласці ім у сэрца і розумы вынікі расследавання крымінальнай справы па факце генацыду беларускага народа. Каб нашая моладзь сутыкнулася з тымі зверствамі, якія тварылі фашысты на нашай тэрыторыі, самастойна разабралася, што такое фашызм і нацызм, хто такія карнікі і калабарацыяністы. Гэта важна, каб яны разумелі памеры трагедый, генацыду, які быў на нашай тэрыторыі. Гэты факт бясспрэчны, ён даказаны матэрыяламі крымінальнай справы.
Адзначаецца таксама, што Ксенія − удзельніца маштабных праектаў, якія атрымліваюць падтрымку прэзідэнцкага спецыяльнага фонда. Карацей кажучы, настолькі ідэалагічна надзейную прыгажуню складана было б знайсці.
Дык хто ж зрабіў прапанову рукі і сэрца Ксеніі? Гэта 25-гадовы Антон Слабыш. Дарэчы, якраз зараз ён шукае працу па спецыяльнасці UX/UI-дызайнер.
Цяпер чытаюць
«Мы даём Штатам тое, што яны хочуць». Расійскі канал апублікаваў відэа, якое называюць запісам Рыжанкова схаванай камерай у машыне14
Каментары