Жыхары Новай Гуты паскардзіліся чыноўніцы на якасць хлеба. Тая правяла эксперымент на працоўным месцы
Чыноўнікі ўсё часцей ідуць у тыкток. Напрыклад, старшыня Гомельскага раённага савета дэпутатаў Вікторыя Ладуцька вырашыла даказаць жыхарам аграгарадка Новая Гута, што яны дарма незадаволеныя якасцю хлеба ў мясцовых крамах.
— Вось такі падарунак з крамы «Райпо» мне сёння даслалі, — расказвае Вікторыя Ладуцька. — Ад жыхароў населенага пункта паступалі пытанні адносна якасці хлебных вырабаў. Хацелася б адзначыць, што ў аграгарадку Новая Гута некалькі крамаў, дзе прадстаўлены шырокі асартымент хлебабулачных вырабаў, у тым ліку і ўласнай вытворчасці. Жыхары паскардзіліся, што хлеб дрэнна рэжацца і праз дзень ён зацвітае. Вось такі хлеб мне перадаў старшыня сельскага савета дэпутатаў — ён купіў яго ў краме гомельскага райспажыўтаварыства.
Чыноўніца вырашыла арганізаваць дэгустацыю на працоўным месцы: спачатку адрэзала кавалачак, потым пакаштавала яго. За эксперыментам са сцяны ўважліва назіраў партрэт маладога Аляксандра Лукашэнкі.
— Хлеб правільнай формы, дэфекту скарынкі не назіраецца, пры нарэзцы не крышыўся, мае кіславаты смак, старонні прысмак і пахі адсутнічаюць, — адзначыла Вікторыя.
Гэта адбывалася ў пятніцу, таму чыноўніца з чыстым сумленнем паклала хлеб у пакет і адправіла яго ў шафу да панядзелка. На пачатку працоўнага тыдня Вікторыя Ладуцька здала справу:
— Цвіль не відаць, хлеб дастаткова мяккі.
Watch on TikTok
Відэа набрала ў тыктоку 272 тысячы праглядаў, 1395 лайкаў і 882 каментарыя. Шмат хто абурыўся вынікамі эксперымента:
«Карацей, як заўсёды бла-бла-бла і ўсё ў парадку без парушэнняў», «Яшчэ б старшыні сельсавета прадалі пазаўчарашні хлеб», «Хлеб і праўда цяпер у вёску не найлепшай якасці прывозяць! А батон назаўтра — адны крошкі!», «Чаму ў вёскі вечна вязуць ТОЛЬКІ гэтыя цагліны? Людзі, якія гэты хлеб вырошчваюць сваімі рукамі, не заслугоўваюць смачнейшага?».
Але знайшліся і тыя, каму такі хлеб падабаецца: «А мая дачка ўжо сёмы год у Мінск возіць нашу правінцыяльную цагліну. Кажа, што яна найлепшая», «Мой любімы хлеб, калі падгарыць скарынка, тэлефануйце мне, забяру».
Відэа стала адным з найбольш папулярных у тыктоку Гомельскага раённага савета дэпутатаў.
Каментары
а чаму шахцёры, рабочыя-нафтавікі, рабочыя заводаў і т.п. працуюць цяжка, а зарабляюць у асноўным балячкі, затое мэнэджары і чыноўнікі атрымліваюць залатыя батоны?