Беларускі гісторык атрымаў прэстыжную навуковую ўзнагароду ў Польшчы
Сёння ў Інстутуце гісторыі Польскай акадэміі навук у Варшаве ўручылі прэмію выдання Rocznik Lituanistyczny, якой ушаноўваюцца навукоўцы, што дасягнулі вялікіх вяршынь у даследаванні гісторыі Вялікага Княства Літоўскага. Лаўрэатам прэміі за 2022 год стаў беларускі гісторык Андрэй Мацук.
У 2018 годзе рэдакцыя прэстыжнага польскага навуковага часопіса Rocznik Lituanistyczny вырашыла прысуджаць штогадовую прэмію за выдатныя дасягненні ў даследавання Вялікага Княства Літоўскага і яго спадчыны.
Узнагароду, паводле правіл яе прысуджэння, маюць атрымліваць аўтары і аўтаркі найлепшых прац, выдадзеных паміж штогадовымі восеньскімі канферэнцыямі Літуаністычных камісій Камітэта гістарычных навук ПАН або даследчыкі, якія адзначаюцца сур'ёзнымі навуковымі заслугамі — за сукупнасць сваёй творчасці.
Сёлетняму лаўрэату Андрэю Мацуку 44 гады. Раней ён працаваў у Інстытуце гісторыі Нацыянальнай акадэміі навук Беларусі, але пасля 2020 года мусіў разам з іншымі навукоўцамі адтуль звольніцца і пераехаць у Польшчу, дзе цяпер і працягвае сваю плённую навуковую дзейнасць.
На сённяшні дзень Андрэй Мацук — аўтар чатырох навуковых манаграфій:
- «Барацьба магнацкіх груповак у ВКЛ (1717—1763 гг.)» (2010);
- «Полацкае ваяводства ў XVIII ст.: ваявода, шляхецкая эліта, соймікі» (2014);
- «Грамадска-палітычнае жыццё Вялікага Княства Літоўскага ў часы бескаралеўя 1733—1735 гг.» (2020);
- «Павятовыя соймікі ў сацыяльна-палітычным жыцці Вялікага Княства Літоўскага (1697—1764 гг.)» (2023).
Першыя тры гэтыя даследаванні выйшлі ў Беларусі пад грыфам Інстытута гісторыі НАНБ, апошняе ж выдадзена ўжо за мяжой, але таксама на беларускай мове.
Раней з беларускіх гісторыкаў гэтая прэмія прысуджалася толькі патрыярху беларускай гістарычнай навукі Георгію Галенчанку. Андрэй Мацук стаў першым ушанаваным гісторыкам з новага пакалення даследчыкаў.
Выйшла кніга пра тое, як нашы продкі ў часы Рэчы Паспалітай вялі палітыку на рэгіянальным узроўні
Кава з гісторыкам: Барацьба магнацкіх груповак у ВКЛ — відэалекцыя
Гісторыка Андрэя Мацука асудзілі на 15 сутак за святкаванне народзінаў у двары з торцікам з «Пагоняй»
Учора ў Мінску затрымалі гісторыка Андрэя Мацука — аднаго з найлепшых знаўцаў гісторыі ВКЛ
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары