Беларуская баскетбалістка «Лондан Лаянс» Кацярына Сныціна завершыць кар'еру пасля заканчэння гэтага сезона, паведамляе «Трыбуна».
«Мой заключны сезон пачынаецца сёння.
Я прыняла рашэнне, што гэты сезон, які стане для мяне 21-м у статусе прафесійнай спартсменкі, будзе заключным.
Прычыны? Я іх для сябе асабіста яшчэ не сфармулявала дакладна, проста я так адчуваю, а прыслухоўвацца да сябе — гэта, дарэчы, адна з многіх якасцяў, якія мне падарыў баскетбол.
Сезон пачынаецца сёння, хто ў Лондане, чакаю ў Copper Box, хто не, то будзе анлайн-трансляцыя.
Ну, пагналі, уступаю ў свой заключны сезон! Ён будзе доўжыцца дзевяць месяцаў, таму прымаю пажаданні толькі аб класным сезоне, а не аб заканчэнні карʼеры», — пракаментавала сваё рашэнне баскетбалістка.
Кацярына Сныціна за сваю прафесійную карʼеру была бронзавай прызёркай чэмпіянату Еўропы 2007 года, двойчы выйгравала чэмпіянат Беларусі, станавілася чэмпіёнкай Францыі, фіналісткай Кубка Еўропы ФІБА, а таксама гуляла са зборнай Беларусі на Алімпійскіх гульнях у Пекіне.
Таксама Сныціна знаходзіцца ў топ-5 баскетбалістак па колькасці ачкоў у Еўракубку.
У 2020 годзе Кацярына Сныціна разам з іншай славутай беларускай баскетбалісткай Аленай Леўчанка падтрымалі народныя пратэсты супраць дыктатуры. Спартсменка была і застаецца адной з сімвалічных постацяў спартыўнага супраціву. Літаральна ўчора яна выказалася ў сацсетках да Дня нацыянальнага сцяга і герба.
«Я «прачнулася» толькі ў 2020-м.
Бел-чырвона-белы — гэта колеры, якія суправаджаюць мяне цяпер заўсёды, куды б я ні перамяшчалася. Сцяг вісіць у кожнай кватэры, дзе я жыву. З гэтым сцягам прыходзяць сябры падтрымаць мяне на баскетбольныя матчы па ўсім свеце.
Гэты сцяг — арыенцір, куды ісці і дзе шукаць сваіх людзей: на такіх мерапрыемствах, як прайд, або мітынгах, арганізаваных мясцовымі супольнасцямі. Гэта мой сцяг, і я ім ганаруся! З Днём нацыянальнага сцяга і герба, дарагія мае!» — напісала Сныціна.
Цяпер чытаюць
Пра Мелказёрава ў яго апошні дзень: «Было адчуванне, што ён стомлены, бракуе энергіі, рысы твару былі запалыя»1
Каментары