Намеснік міністра замежных спраў Літвы падаў у адстаўку: яго злавілі за рулём нападпітку
«Я зрабіў вялікую і недаравальную памылку — ехаў п'яны, таму я пакідаю пасаду намесніка міністра замежных спраў», — напісаў сёння Мантас Адаменас у фэйсбуку.
Ён расказаў, што ўчора доўга святкаваў з сябрамі.
«Я думаў, што буду цвярозы, і паехаў за тры кіламетры ад гарадка ў Малетайскім раёне на возера купацца. Аказалася, што я памыліўся: на зваротным шляху мяне праверылі паліцыянты і выявілі ў крыві 0,62 праміле алкаголю», — напісаў Мантас Адаменас.
«Гэта толькі мая віна. Мне вельмі шкада. Я не спрабую апраўдвацца. Я прашу прабачэння ва ўсіх, чый давер я падмануў сваімі дзеяннямі», — дадаў ён.
Мантасу Адаменасу 52 гады. Ён скончыў філалагічны факультэт Віленскага ўніверсітэта са ступенню бакалаўра, а таксама факультэт класічных навук Кембрыджскага ўніверсітэта са ступенню магістра філасофіі.
Валодае англійскай, рускай, італьянскай, польскай, нямецкай, французскай, старажытнагрэцкай, лацінскай мовамі.
Нейкі час працаваў выкладчыкам. У 2008—2020 гадах быў дэпутатам Сейма Літвы ад кіроўнага сёння Саюза Айчыны — Літоўскіх хрысціянскіх дэмакратаў. З 2020 года — віцэ-міністр замежных спраў.
Сфера дзейнасці і функцыі яго былі наступныя:
- пытанні фарміравання і рэалізацыі палітыкі Літвы ў ААН, ЕС і іншых шматбаковых фарматах;
- пытанні каардынацыі рэалізацыі міжнародных санкцый;
- пытанні развіцця адносін з дзяржавамі Блізкага Усходу, Лацінскай Амерыкі і Афрыкі;
- пытанні ўмацавання палітыкі ўсходняга суседства, развіцця двухбаковых і шматбаковых адносін з дзяржавамі Усходняй Еўропы, Паўднёвага Каўказа і Сярэдняй Азіі ды інш.
Віцэ-міністр Літвы: Восенню ў Сейме можа быць разгледжана пытанне аб выдачы ліцэнзій на аўтобусныя рэйсы ў Беларусь
«Сёння мы адчуваем сябе як Заходні Берлін у часы халоднай вайны». Літва заклікала Нямеччыну паспяшацца з размяшчэннем чатырох тысяч салдат
Закрыццё двух пераходаў на мяжы з Літвой перанеслі
Каментары