8 жніўня памерла прафесарка Святлана Мусіенка. Ёй было 83 гады. Пра смерць жанчыны паведаміла ў фэйсбуку доктарка Барбара Олех з Універсітэта ў Беластоку, піша Hrodna Life.
Святлана Мусіенка з 1967 года выкладала ў Гродзенскім універсітэце імя Янкі Купалы (раней — педагагічны інстытут), а ў 1989 стварыла ў ім кафедру польскай філалогіі.
«Выдатная знаўца польскай літаратуры і культуры, сяброўка многіх паланістаў, арганізатарка шматлікіх канферэнцый у Гродне. […] Гадамі разам з супрацоўнікамі сваёй кафедры яна актыўна падтрымлівала Польскую Дыктоўку ў Беларусі, якую арганізоўвала Польска Мацеж Школьна. Удзельнічала ў нацыянальных чытаннях у генеральным консульстве Польшчы ў Гродне. […] Прафесарка Мусіенка была бясспрэчным навуковым аўтарытэтам, а таксама надзвычай справядлівым, зычлівым і цёплым чалавекам», — напісала пра памерлую Барбара Олех.
Святлана Мусіенка нарадзілася 30 жніўня 1939 у Данецкай вобласці Украіны. У 1963 скончыла Беларускі дзяржаўны ўніверсітэт па спецыяльнасці «Руская мова і літаратура» і паступіла ў аспірантуру. Стажыравалася ў Варшаўскім універсітэце. З 1967 працавала ў Гродне, у 1971 абараніла кандыдацкую дысертацыю ў АН СССР.
У 1989 Святлана Мусіенка выдала першую ў СССР манаграфію, прысвечаную польскай пісьменніцы Зоф'і Налкоўскай, якая ў 1920-я гады жыла ў Гродне. Тады ж Мусіенка стварыла кафедру польскай мовы і літаратуры ў ГрДУ і правяла на ёй першую канферэнцыю, прысвечаную Налкоўскай. У час канферэнцыі ва ўніверсітэце адкрыўся музей пісьменніцы, а на доме па вуліцы Акадэмічнай, дзе жыла Налкоўская, адкрылі памятную шыльду.
У 1993 годзе Святлана Мусіенка абараніла ў Расійскай акадэміі навук доктарскую дысертацыю і неўзабаве стала першай у Беларусі прафесаркай паланістыкі. Апублікавала некалькі сотняў навуковых прац па польскай літаратуры, удзельнічала ў мностве навуковых канферэнцый у Беларусі, Расіі, Украіне, Польшчы, Швейцарыі і Славеніі. Пад кіраўніцтвам Мусіенка кафедра выпусціла больш за 500 спецыялістаў па польскай мове, літаратуры і культуры.
«Цудоўная ўкраінка, грамадзянка Беларусі, выдатны навуковец, сябар Польшчы і польскай культуры», — пісаў пра Святлану Мусіенка прафесар Універсітэта ў Беластоку Яраслаў Лаўскі ў 2012 годзе.
У 2019 годзе Святлану Мусіенка адзначылі прэміяй Polonicum. Яе прысуджае замежнікам Варшаўскі ўніверсітэт за асаблівыя заслугі ў папулярызацыі польскай мовы, гісторыі і культуры.
Цяпер чытаюць
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый46
Лукашэнка назваў патрабаванні і прэтэнзіі да Літвы: альтэрнатыўны ўрад, харугвы, порт, машыны для Зімбабвэ, санаторый
«Быў галодны, як з Асвенціма, не еў ні мяса, ні гародніны». Што вядома пра смерць бабруйскага журналіста, на якога завялі крымінальную справу ў Польшчы2424
Каментары