Беларусь — адзін з асноўных пастаўшчыкоў мяса птушкі ў Расію — з пачатку жніўня абмежавала экспарт прадукцыі ўсюды, акрамя Кітая, тлумачачы гэта неабходнасцю насыціць попыт унутры краіны. Рэальнай прычынай можа быць успышка птушынага грыпу на некаторых фабрыках, мяркуюць удзельнікі расійскага рынку.
Яны чакаюць, што рашэнне можа павялічыць рост цэн на кураціну, які адбываецца ў РФ з канца 2022 года. У Рассельгаснаглядзе, зрэшты, разлічваюць на забеспячэнне патрэб унутранага рынку лакальнымі гульцамі, піша «Коммерсант».
Пра тое, што Беларусь з 1 жніўня абмежавала вываз з краіны мяса птушкі, распавялі дзве крыніцы «Коммерсанта» ў галіне. З наяўных копій лістоў Дэпартамента ветэрынарнага і харчовага нагляду Мінсельгасхарча Расіі вынікае, што ў мэтах насычэння ўнутранага рынку прыпынена выдача сертыфікатаў на экспарт тушак куранят-бройлераў і іх частак.
У гэтых жа зваротах гаворыцца, што абмежаванні не распаўсюджваюцца на экспарт у Кітай і прадукцыю буйнога ў краіне холдынга «Сервалюкс Агра» (брэнд «Пятруха»).
У Рассельгаснаглядзе паведамілі, што пакуль не атрымлівалі апавяшчэнняў ад беларускага боку аб прыпыненні паставак і ўзнікненні ачагоў эпізаатыі. Пра гэта ж кажуць і ва «Вкусвилле». Іншыя федэральныя сеткі не адказалі на пытанні.
Два суразмоўцы на рынку лічаць, што сапраўдная прычына абмежавання экспарту звязана з меркаванай успышкай птушынага грыпу на некаторых птушкафабрыках Беларусі.
Такая сітуацыя часцяком прыводзіць да зніжэння выпуску мяса курыцы. Традыцыйна беларускі бок пра факты ўспышак афіцыйна не паведамляе.
У Нацыянальным саюзе мясаперапрацоўшчыкаў (НСМ) звязваюць абмежаванні з правядзеннем з 4 жніўня ў 11-ці гарадах рэспублікі II Гульняў краін СНД, падчас якіх попыт на прадукты на ўнутраным рынку можа прыкметна павялічыцца.
Таму, мяркуюць там, мера можа аказацца кароткатэрміновай.
Мікола Бугай: Трэба перагарнуць старонку 2020-га і пачаць жыць новымі рэаліямі53
Каментары