На пасаду галоўнага трэнера футбольнай зборнай Беларусі разглядаецца легенда «Барселоны» — БФ
Хасэ Марыя Бакера — кандыдат на пасаду галоўнага трэнера зборнай Беларусі, як паведамляе «Беларускі футбол».
Бакера гуляў за «Рэал Сасьедад» у 1980-1988 гадах і прыязджаў, дарэчы, у Мінск на матч Кубка УЕФА ў лістападзе 1987 года (0:0), пасля гуляў за «Барселону» (1988-1997).
За 9 гадоў у каталонскім клубе Хасэ Марыя Бакера даслужыўся да капітана, згуляў у 339 сустрэчах, забіў 94 галы і выйграў 14 трафеяў, уключаючы Лігу чэмпіёнаў.
Раней 60-гадовы іспанскі спецыяліст уваходзіў у трэнерскія штабы «Барселоны» і «Валенсіі». Быў спартыўным дырэктарам «Рэала Сасьедада», а пазней і галоўным трэнерам клуба.
У сезоне 2010/11 узначальваў польскі «Лех», калі там гуляў беларускі паўабаронца Сяргей Крывец.
Працаваў у розных структурах юнацкіх і моладзевых каманд «Барселоны». Быў кіраўніком скаўцкага бюро «Сіне-гранатавых».
Цяпер займае пасаду галоўнага трэнера балгарскай «Славіі». У мінулым сезоне клуб фінішаваў на 8-м месцы.
На мінулым тыдні Федэрацыя футбола звольніла Георгія Кандрацьева з пасады галоўнага трэнера нацыянальнай зборнай.
Кандрацьеў у другі раз узначаліў зборную ў 2021 годзе, за гэты час каманда здабыла толькі адну афіцыйную перамогу. Прычым у апошнім матчы пад кіраўніцтвам трэнера над зборнай Косава, перад гэтым прайграўшы тры матчы ў адборы да Еўра-2024.
БФФ паабяцала прызначыць новага трэнера ў найбліжэйшы час, прычым паведамлялася, што новым коўчам можа стаць замежны спецыяліст. У 2007-2011 гадах зборную трэніраваў немец Бернд Штанге.
Цяпер чытаюць
Таццяна Заміроўская першы раз за 11 гадоў вярнулася з ЗША ў Еўропу. Многія манеры, звычкі і нават птушкі, якіх мы не прыкмячаем, выклікалі ў яе буру ўспамінаў33
Каментары