Аўстралія першай легалізавала медыцынскае выкарыстанне экстазі і галюцынагенных грыбоў

Як піша Le Monde, Аўстралія стала адной з першых краін у свеце, якая дазволіла выкарыстанне экстазі і галюцынагенных грыбоў для медыцынскіх мэт. Псіхіятры тут з 1 ліпеня могуць прызначаць МДМА для лячэння посттраўматычнага стрэсавага расстройства, а псілацыбін з галюцынагенных грыбоў — пры дэпрэсіі, якая не паддаецца іншым спосабам лячэння.

Такое рашэнне было прынята ў лютым гэтага года Нацыянальнай радай Аўстраліі па алкаголі і наркотыках.

МДМА, таксама вядомы як экстазі для вечарынак, уяўляе сабой сінтэтычны наркотык, які дзейнічае як галюцынаген. Такім жа дзеяннем з-за актыўнага злучэння псілацыбіну валодае каля 200 відаў грыбоў.

Хоць Аўстралія — першая краіна ў свеце, якая рэгулюе выкарыстанне наркотыкаў у якасці лекаў, клінічныя выпрабаванні таксама праводзяцца ў ЗША, Канадзе і Ізраілі.

Аўстралія перакласіфікавала гэтыя рэчывы пасля выпрабаванняў, праведзеных Аўстралійскім упраўленнем па тэрапеўтычных таварах, якое ацаніла іх як «адносна бяспечныя» пры выкарыстанні ў «асяроддзі, кантраляваным з медыцынскага пункту гледжання».

Прыхільнікі рашэння спадзяюцца, што гэтыя рэчывы могуць прывесці да вырашальных поспехаў у лячэнні некаторых псіхічных расстройстваў.

Майк Маскер (Mike Musker), даследчык у галіне псіхічнага здароўя і прадухілення самагубстваў ва Універсітэце Паўднёвай Аўстраліі, у інтэрвʼю выданню адзначыў, што МДМА дае пацыентам «пачуццё сувязі», якое дазваляе ім аблегчыць кантакт з тэрапеўтам і абмеркаваць свой траўматычны досвед.

Маскер лічыць, што «псіхадухоўны эфект» псілацыбіну, «якога вы не атрымліваеце з дапамогай традыцыйных медыкаментаў, можа змяніць ваша ўспрыманне сябе і, калі пашанцуе, можа даць вам жаданне жыць».

Спецыяліст сумняваецца, што гэтыя прэпараты будуць «шырока выкарыстоўвацца» пацыентамі да 2024 года. Само ж лячэнне не будзе выглядаць як просты прыём таблеткі. Экстазі, напрыклад, напэўна, запатрабуе трох прыёмаў цягам пяці-васьмі тыдняў.

Прычым кожны сеанс будзе доўжыцца каля васьмі гадзін пры непасрэднай прысутнасці псіхатэрапеўта. Акрамя таго, з-за дарагоўлі (каля 1000 аўстралійскіх долараў, або 609 еўра) такія сеансы не будуць даступныя кожнаму.

Аднак, як адзначае Le Monde, гэты дазвол не быў аднадушна падтрыманы ў навуковай супольнасці. Некаторыя даследчыкі лічаць яго заўчасным.

Так, кагнітыўны нейрапсіхолаг прафесар Суінбернскага тэхналагічнага ўніверсітэта ў Мельбурне Сьюзен Росел (Susan Rossell) адзначыла, што хоць гэтыя метады лячэння «маюць патэнцыял», Аўстралія «прасоўваецца наперад на пяць гадоў раней, чым яна павінна гэта зрабіць».

Прафесар заўважае, што «для любога іншага тыпу захворвання, як сардэчна-сасудзістыя захворванні або рак, немагчыма вывесці лекі на рынак гэтак жа хутка, як зроблена ў гэтым выпадку».

Лекі не прайшлі ўсе неабходныя клінічныя выпрабаванні, у прыватнасці, няма параўнання іх эфектыўнасці з тэрапіяй, якая цяпер прымяняецца, ці з плацэба.

Аўстралійскае ўпраўленне па тэрапеўтычных таварах, у сваю чаргу, адзначае, што рашэнне «прымае да ўвагі той факт, што доказы выкарыстання гэтых рэчываў для лячэння псіхічных захворванняў яшчэ не ўстаноўленыя».

У той жа час «перавагі для некаторых пацыентаў пераважваюць рызыку, і цяпер бракуе варыянтаў для пацыентаў, якія пакутуюць ад пэўных псіхічных захворванняў, што з цяжкасцю паддаюцца вылечванню».

Чытайце яшчэ: 

ЛСД, псілацыбін і экстазі ў аптэках: як навукоўцы даследуюць псіхадэлікі, каб стварыць новыя лекі

У Калумбіі маюць легалізаваць экстазі

• 10
• 0
• 0
• 3
• 3
• 1
• 0
• 0