Паўлу Мажэйку — 45 гадоў. Ён сустракае дзень народзінаў за кратамі
Гродзенскага журналіста затрымалі 30 жніўня, калі ён вярнуўся з Польшчы. Ужо дзевяць месяцаў ён знаходзіцца за кратамі.
За што арыштавалі Паўла, дакладна невядома, адвакат знаходзіцца пад падпіскай аб неразгалошванні. 20 верасня праваабарончыя арганізацыі Беларусі прызналі Паўла палітычным вязнем. У абарону журналіста з патрабаваннем яго вызвалення выступіла таксама Еўрапейская федэрацыя журналістаў.
У сеціве з’явілася старонка, прысвечаная Паўлу Мажэйку. Сайт распавядае, хто такі Павел, чаму ён чалавек-легенда і як яго можна падтрымаць.
Павел Мажэйка — вядомы журналіст, менеджар культуры, стваральнік ліквідаванай уладамі культавай гродзенскай прасторы «Цэнтр гарадскога жыцця», каардынатар выдавецкай ініцыятывы «Гарадзенская бібліятэка», якая спецыялізавалася на выданні кніг аўтараў з Гродна і пра Гродна.
У сакавіку 2021 года Паўла Мажэйку затрымалі разам з мастаком Алесем Пушкіным, які выставіў у «Цэнтры гарадскога жыцця» партрэт дзеяча антысавецкага руху часоў Другой сусветнай вайны. У дачыненні да Паўла распачалі крымінальную справу «за наўмысныя дзеянні, скіраваныя на рэабілітацыю і апраўданне нацызму».
Але пасля 72 гадзін затрымання Паўла вызвалілі з фармулёўкай «зніклі падставы для затрымання». У канцы 2021 года крымінальную справу супраць яго спынілі. Пасля гэтага Павел мог з'ехаць з Беларусі, аднак ён заставаўся ў краіне.
Падтрымаць журналіста можна, даслаўшы паштоўку альбо грашовы перавод па адрасе: 230023, г. Гродна, турма №1, СІЗА, вул. Кірава, 1, Мажэйку Паўлу Іванавічу.
За кратамі знаходзяцца 33 журналісты.
Каментары