У Мінск запускаюць авіярэйс з Ірана па дзікіх цэнах. Але не ўсё так страшна, калі сячы ў нюансах
Заўтра пасля доўгага перапынку з іранскай сталіцы Тэгерана ў Мінск пачынаюць лётаць самалёты. Праўда, цэны на квіткі могуць здацца, мякка кажучы, дзіўнымі: ад 3500 даляраў у адзін канец у эканом-класе да 10000 даляраў туды-назад у «бізнэсе». Як гэта наогул магчыма, хто ж за такія грошы паляціць? Нюансы тлумачыць выданне Blizko.by.
Прадстаўнікі Міністэрства транспарту абяцалі, што з 26 сакавіка пачнуцца палёты іранскай авіякампаніі Mahan Air у Тэгеран. Яшчэ ў лістападзе 2022-га Дэпартамент па авіяцыі выдаў перавозчыку акрэдытацыю, але пакуль ні ў сезонным раскладзе мінскага аэрапорта, ні ў сістэме браніравання самой кампаніі гэты рэйс не з'яўляўся. І вось цяпер раптам у раскладзе аэрапорта Мінск значыцца рэйс гэтай самай Mahan Air, а на сайце перавозчыка можна купіць квіткі.
Гэта будзе першы за апошнія амаль шэсць гадоў рэйс у Іран. Раней «Белавія» ўжо выконвала палёты з Мінска ў Тэгеран з 4 жніўня 2010 года да 28 кастрычніка 2017-га. Але тады Мінск нядрэнна спраўляўся з хабавай мадэллю перавозак, даючы магчымасць пасажырам з Ірана далей перасаджвацца на дзясяткі рэйсаў у Еўропу. Цяпер з Мінска на захад шлях закрыты.
Што за дзікая цана квіткоў?
Глядзім у сістэму браніравання. Квіток у адзін канец каштуе 146 597 000 іранскіх рыалаў у эканом-класе і 268 957 000 рыалаў у бізнэс-класе. Квіткі туды-назад абыдуцца ў 240 607 000 рыалаў у «эканоме» і 430 327 000 у «бізнэсе».
Колькі гэта ў звыклых нам адзінках? Цяпер афіцыйны курс такі: 1 рыал каштуе 0,00002368 даляра. Іншымі словамі, за 1 даляр можна атрымаць прыкладна 42230 рыалаў. Такім чынам, паводле афіцыйнага курсу атрымліваецца, што квіткі ў адзін бок у эканом-класе і бізнэс-класе каштуюць 3471 і 6369 даляраў адпаведна, а туды-назад — 5698 і 10190 даляраў адпаведна.
Дзесяць тысяч даляраў за 5-гадзінны палёт? Гэта што, прыватны бізнэс-джэт? Не, не бізнэс-джэт, а асаблівасці курсу іранскай валюты.
З-за дэвальвацыі і інфляцыі ў Іране дзейнічаюць некалькі курсаў валюты: умоўна іх можна назваць «белы», «чорны» і «шэры».
«Белы», афіцыйны курс, — гэта тыя самыя прыкладна 42 тысячы рыалаў за даляр. Яго выкарыстоўваюць іранскія кампаніі, якія імпартуюць жыццёва важныя тавары — лекі, пшаніцу, мяса.
Курс NIMA — яго можна ўмоўна назваць «шэрым» — выкарыстоўваецца экспарцёрамі, каб увесці ў іранскую эканоміку валюту, атрыманую ад гандлю з замежжам. Курс NIMA цяпер складае прыкладна 382 000 рыалаў за даляр. Ёсць яшчэ курс SANA, яго таксама можна назваць «шэрым», — ён усталяваны для абменнікаў. Па гэтым курсе даляр каштуе прыкладна 420 000 рыалаў.
Нарэшце, «чорны» курс — курс на чорным рынку — найбольш набліжаны да рэальнасці: каля 515-520 тысяч рыалаў за даляр. На гэтым сайце можна адсочваць рэальныя (гэта значыць, «чорныя») курсы валют у Іране — тыя курсы, па якіх можна будзе купіць валюту. Звярніце ўвагу на тое, што выкарыстоўваецца тэрмін «таман» — гэта 10 рыалаў.
Так, сёння даляр прадаюць за 51750 таманаў — або 517500 рыалаў. А цяпер пераводзім цэны квіткоў па рэальным курсе і атрымліваем:
У адзін бок: 283 даляры ў эканом-класе і 520 даляраў у бізнэс-класе;
Туды-назад: 465 даляраў у эканом-класе і 832 даляры ў бізнэс-класе.
Такім чынам, нічога звышнатуральнага, як аказваецца, у гэтых цэнах няма.
Каментары