Хочаце слухаць кнігі па-беларуску? Мы адшукалі сем рэсурсаў, дзе гэта можна зрабіць.
«Кніжны воз»
Утульны рэсурс з беларускімі кнігамі стварыла Крысціна Дробыш, былая актрыса Купалаўскага тэатра і незалежнай трупы «Купалаўцы», а цяпер тэлевядучая «Белсата». Пачыналі з дзіцячых кніг, бо, як тлумачыла Крысціна, гэта вельмі трэба малым.
А потым выявілася, што шматлікія з нібыта дзіцячых твораў насамрэч цікавыя і дарослым: узяць таго ж Шэрлака Холмса, якога Дробыш называе «літаратурай па-за гадамі». Дарэчы, нядаўна нароўні з «Прыгодамі Шэрлака Холмса», якія цалкам з’явіліся на «Кніжным возе» восенню мінулага года, туды дадалі яшчэ і першую частку аповесці «Шэрлак Холмс: эцюд у пунсовым».
На «Кніжным возе» ёсць не толькі беларуская класіка накшталт «Ладдзі роспачы», але і замежныя славутыя творы («Маўглі», «Том Соер», «Хронікі Нарніі»), і гэта так каштоўна, што можна знаёміцца з сусветнымі дзіцячымі скарбамі па-беларуску. Часам стваральнікі сэрвісу папаўняюць яго дзіцячымі песнямі — напрыклад, там ёсць цэлы калядны альбом! І адзначым несумненны плюс рэсурсу: ён мае ўласны мабільны дадатак.
Яшчэ адна разынка «Кніжнага возу» — душэўныя відэа пра тое, як ствараюцца аўдыякнігі ад праекта. Глядзіце самі:
Сайт / Інстаграм / дадатак для Android / дадатак для Apple
«Беларуская палічка»
Гэта старэнькая электронная бібліятэка, якая, акрамя кніг у звыклым тэкставым фармаце, змяшчае і аўдыякнігі. Іх можна слухаць на самім сайце, а можна і спампаваць.
Творы тут ёсць унікальныя і часам нечаканыя: узяць, напрыклад, «Мой капітал» ад Станіслава Багданкевіча, беларускамоўныя аўдыяспектаклі па Гогалю пачатку 1950-х гадоў ці чатыры Евангеллі ў агучванні «дылетанта» Юрыя Жыгамонта. Хапае на «Палічцы» твораў сусветна вядомых аўтараў (Джордж Оруэл, Шата Руставелі, Уільям Фолкнер і іншыя) і вялікіх беларусаў (Іван Шамякін, Іван Мележ, Якуб Колас і іншыя). Занырвайце!
Audiobooks.by
Гэты рэсурс не змяшчае самі кнігі, а падказвае, на якіх пляцоўках іх можна адшукаць. Цяпер, расказваюць стваральнікі audiobooks.by, на іх рэсурсе ёсць спасылкі на 497 кніг, і гэта цудоўная магчымасць не шукаць патрэбную кніжку па ўсіх кутках інтэрнэту, а знайсці ўсё, чаго душа просіць (і пра што вы не здагадваліся), у адным месцы.
Пару тыдняў таму audiobooks.by разам з праектам «Кніжны воз» прэзентавалі прэм’еру, створаную з удзелам сотні беларусаў і беларусак. Гэта кніга «Мова 404», у якой актывістка Аліна Нагорная сабрала гісторыі дыскрымінацыі беларусаў у роднай краіне за тое, што яны гутараць па-беларуску. Эпізоды з кнігі запісвалі не вопытныя акцёры агучвання, а простыя беларусы без прафесійнага тэхнічнага абсталявання ў бытавых умовах. «Калі я раблю агучванне, то мае два сабакі садзяцца побач і ўважліва слухаюць», «Запісы рабіла, пакуль побач спіць чатырохмесячная дачушка» — так удзельнікі праекта расказвалі пра сваю працу.
Не хочаце слухаць пра дыскрымінацыю мовы? Паспрабуйце светлы і гумарны твор «Аўтаспынам па галактыцы», глыбокі раман «Працэс» ад Кафкі ў выкананні Алега Гарбуза ці вытанчаны зборнік эсэ палітзняволенага філосафа Уладзіміра Мацкевіча «Свабода і мысленне» і шмат іншых кніг, знайсці якія дапамагае рэсурс.
«Чытанка: аўдыякнігі Беларусі»
Сам па сабе рэсурс «Чытанка» дужа зручны: запампоўваеце сабе мабільны дадатак і слухаеце, тым больш што выбар кніг у дадатку неблагі. Дызайн праграмы мінімалістычны і прыгожы, карыстацца такім дадаткам прыемна.
Але вось няўдача: сярод твораў на гэтым рэсурсе нядаўна з’явіліся кнігі Андрэя Мукавозчыка і Мікалая Чаргінца. Калі не хочаце лішні раз сутыкацца з іх літаратурнай творчасцю, напэўна, лепш выбраць іншы рэсурс.
«Купалаўцы»
Самая беларуская з усіх беларускіх тэатральных камандаў выпускае яшчэ і аўдыяспектаклі з аўдыякнігамі. Купалаўцы выкладаюць іх на ўласным ютуб-канале.
На сёння гэта толькі тры творы, але якія — «Ордэн Белай Мышы» Уладзіміра Арлова, «1984» Джорджа Оруэла і «Радзіва «Прудок» Андруся Горвата. Якасць гарантаваная, як гэта заўсёды і бывае ў купалаўцаў.
«Камунікат»
Славутая беларуская інтэрнэт-бібліятэка «Камунікат» таксама змяшчае аўдыякнігі. Адразу адзначым відавочны мінус рэсурсу: няма ні адмысловага мабільнага дадатку, ні магчымасці слухаць кнігі анлайн, можна толькі пампаваць іх на сваю прыладу і слухаць такім чынам.
Але калі гэта перашкаджала аматарам добрай кнігі? Тым больш што такія творы тут сапраўды ёсць. Адзначым, напрыклад, «Дамавікамерон» Адама Глобуса, «Ферму» Джорджа Оруэла, «Сабак Еўропы» Альгерда Бахарэвіча ды іншыя, больш звыклыя і класічныя выданні.
Беларускі ПЭН
На сайце гэтай арганізацыі маецца выдатная аўдыятэка са шмат якімі творамі, якіх вы не знойдзеце больш нідзе. Выбітная яна, перш за ўсё, праз магчымасць праслухаць творы сучасных аўтараў: тут і Наста Кудасава, і Надзея Ясмінска, і шмат-шмат іншых. Ёсць і зусім рэдкія рэчы: як вам, напрыклад, «У рэвалюцыі жаночае аблічча?» ад Вольгі Шпарагі? На жаль, няма зручнага мабільнага дадатку і/ці магчымасці спампаваць кнігі, але дзякуй і проста за магчымасць паслухаць такія каштоўнасці.
«Наша Нiва» — бастыён беларушчыны
ПАДТРЫМАЦЬ
Цяпер чытаюць
«Патраціла 300 рублёў — а яшчэ толькі сярэдзіна чэрвеня!» Беларусы абмяркоўваюць выдаткі на пакос травы і дзеляцца лайфхакамі4
Каментары