Дзевяць мабільных праграм, якія павялічаць колькасць беларускамоўнага кантэнту ў вашым жыцці

Кніжны Воз

Бясцэнны дадатак для тых, хто жадае заўсёды мець магчымасць слухаць кнігі па-беларуску. Спіс кніг тут досыць арыгінальны: ад больш-менш класічных «Прыгод Рабінзона Круза» і «Маўглі» да твораў сучаснай дзіцячай пісьменніцы Надзеі Ясмінскай, «Хронікаў Нарніі» і вершаў Андрэя Скурко. Кантэнт у дадатку збольшага дзіцячы.

Android Market / App Store

Skarnik — белорусский словарь

Адзін з найлепшых беларускіх анлайн-слоўнікаў можа стаць да вас яшчэ бліжэй. І руска-беларуская, і беларуска-руская версіі «Скарніка» маюць больш за 100 тысяч слоў, таксама на рэсурсе даступны неблагі тлумачальны слоўнік. Выданне ўвесь час абнаўляецца, таму не бойцеся атрымаць ад яго састарэлыя версіі лексікі.

Android Market / App Store

Лемантар — беларускі алфавіт

Простая і зразумелая дзіцячая гульня, якая дапаможа маленькім беларусам вывучыць родныя літары. Дзіцяці прапануюць яркія карткі з малюнкамі, па якіх можна вывучаць словы і літары, і аўдыяверсіі літар, а таксама гульні, у якіх можна праверыць свае веды. Усё наглядна і прыгожа — тое, што трэба, каб прыцягнуць увагу дзіцяці.

Android Market / App Store

Мова прафесіі

Назва гэтага дадатку можа гучаць занадта спецыялізавана для звычайнага карыстальніка, але ж насамрэч гэта цудоўны спосаб трошкі пашырыць свой слоўнікавы запас. Напрыклад, калі вы фанат ранішняй кавы, прайдзіце модуль пра камунікацыю ў кавярнях, хочаце падцягнуць веды па беларускіх назвах прадуктаў — вам шлях у раздзел «Крамы». І не праходзьце міма часткі «Асновы»: яна дапаможа вам палепшыць фанетыку, падвучыць адметныя беларускія словы і шмат іншага.

Android Market / App Store

Крыжаванкі

Класічная крыжаванка, толькі на беларускай мове. Ёсць розныя версіі складанасці, крыжаванкі, дзе трэба перакладаць з рускай мовы, розныя падказкі, магчымасць гуляць афлайн і нават начная тэма для гульні ўвечары. Але будзьце асцярожныя: гэтая гульня насамрэч зацягвае.

Android Market / App Store

Шлях

Яшчэ адна гульня, што падцягне ваш узровень беларускай мовы. Заданне простае — злучаць літары ў словы. Стваральнікі абяцаюць, што гульня не дазволіць засумаваць нават самым кемлівым, бо з кожным узроўнем словы ўскладняюцца. Добра, што ў гульню ўбудаваны слоўнік, які дазваляе праглядзець і пераклад слова, і яго тлумачэнне.

App Store

Kazki

Адзін з найлепшых беларускамоўных праектаў у свеце мабільных дадаткаў: бібліятэка з 53 казак, прафесійна агучаных Алегам Хаменкам і гуртом «Палац». Разам з казкамі вы атрымаеце больш за 15 ілюстрацый з героямі беларускага фальклору і магчымасць размаляваць кожную з іх.

Android Market / App Store

Ведай мову!

Дадатак, што дае магчымасць папоўніць веды па беларускай мове і патрэніраваць памяць. У адрозненне ад мінулых праграм, «Ведай мову!» надае больш увагі граматыцы, чым лексіцы, і гэтым ён цікавы.

Android Market

Беларускае Радыё Рацыя

Вядома, тут ёсць навіны, нездарма ж гэта дадатак медыя. Але не абыдзіце ўвагай і падкасты, прадстаўленыя «Радыё Рацыя». Тут вы знойдзеце выпускі пра гісторыю, культуру і адукацыю, грамадства і эканоміку, а таксама забаўляльныя перадачы — спісу хопіць надоўга.

Android Market / App Store

10 песень па-беларуску, якія можна слухаць і спяваць з дзіцём

6 беларускамоўных ютуб-каналаў, якія вы маглі прапусціць

Хочаце на роднай мове? Вось пяць рэсурсаў, дзе можна паглядзець кіно па-беларуску

• 57
• 0
• 2
• 0
• 0
• 0
• 5
• 0