«Патрыятызму шмат не бывае». Школьны ваенрук з шаблямі адкрыў патрыятычны клуб, а яго жонка — «ГітАрмію»
У Станькаве, на базе Дзяржынскага раённага цэнтра турызму і краязнаўства збіраюцца адкрыць новы ваенна-патрыятычны клуб «Грэнадзёр». Яго кіраўнік Яўген Уласевіч — маёр запасу, кіраўнік па ваенна-патрыятычным выхаванні ў Негарэльскай сярэдняй школе №1. А таксама майстар па абыходжанні з шаблямі.
У школе, піша дзяржынскі партал, Уласевіч кіруе таксама вайскова-патрыятычным клубам «Айчына». А яго жонка — гуртком «ГітАрмія». Абрэвіятура не расшыфроўваецца — магчыма, яна ўтворана ад слова «гітара», а магчыма і не.
«Патрыятызму шмат не бывае», — тлумачыць Уласевіч, навошта яны стварылі яшчэ адзін патрыятычны клуб.
«Пастаянна ўдзельнічаем у рэканструкцыях ваенных, — расказвае ён. — Мая жонка Надзея навучае дзяцей ігры на гітары ў гурце «ГітАрмія». Рэпертуар у нас у асноўным ваенна-гістарычны. Паспяхова выступаем з канцэртамі «Гартаючы старонкі ваеннай гісторыі», ствараем ваенны антураж».
Акрамя таго, з дзецьмі на базе Дзяржынскага раённага цэнтра турызму і краязнаўства праводзяцца заняткі па дапрызыўнай падрыхтоўцы, тактыцы і ўзбраенні, ёсць стралковыя трэнажоры.
Мяркуючы па сацсетках Уласевіча, ён аматар Расіі.
Ніжэй можна пабачыць выступленне ваенрука з шаблямі.
Каментары