Сабака Патрон. Хто і колькі зарабляе на папулярным джэк-расел-тэр'еры
Украінскі сабака пароды джэк-расел-тэр'ер набыў папулярнасць у 2022 годзе, калі размініраваў палі, будынкі, вуліцы гарадоў разам з сапёрамі Чарнігаўскай абласной Дзяржаўнай службы па надзвычайных сітуацыях (ДСНС). Акрамя гэтага, у маі Уладзімір Зяленскі ўзнагародзіў Патрона медалём «За адданую службу». Forbes даведаўся, каму належаць правы на выяву самага вядомага сабакі Украіны і хто зарабляе на брэндзе «сабака Патрон».
Ужо з сярэдзіны вясны ў крамах пачалі прадаваць мяккія цацкі ў выглядзе сабакі Патрона, на розных таварах з'явіліся яго выявы. Такія карцінкі ёсць на каве, цукерках і сасісках. І гэта не проста хайп. Такім чынам вытворцы прыцягваюць аўдыторыю Патрона да свайго прадукту, тлумачыць сузаснавальнік рэкламнага агенцтва Tabasco Аляксандр Смірноў. «Гэты эфект прасочваецца ў любой кампаніі з удзелам селебрыці», — кажа ён.
А тое, што гэты сабака — селебрыці, пацвярджаюць даныя сацыяльных сетак. У інстаграме ў старонкі Патрона 389 000 падпісчыкаў, у тык-току — 514 000, у твітары — 70 000. Песню пра сабаку ўкраінскага гурта Karta Svitu на YouTube за пяць месяцаў паглядзелі 2 млн разоў. Трэк уключылі ў навагодні канцэрт на ТБ.
Хоць Патрон ёсць адным з сімвалаў цяперашняй вайны, ён нясе станоўчы пасыл. «Патрон — гэта пра выратаванне жыцця, каштоўнасці, патрыятызм, цяпло і клопат», — кажа Смірноў.
Хто зарабляе на выяве сабакі Патрона
Выкарыстанне выявы сабакі-зоркі не бясплатнае. Аўтарскімі правамі на яго займаецца кампанія «Патрон не спіць». У прыватнасці, з ёй заключылі пагадненні кандытарская фабрыка Lukas, якая вырабляе глазураваныя цукеркі Patron, а таксама вытворцы цацак WP Merchandise, якія выпусцілі мяккія цацкі, падушку і футравую сумку з выявай комікса Патрона. І кампанія «Зрабіў тата», якая стварыла ёлачныя цацкі.
Вытворца тавараў для жывел Collar, па словах кіраўніка секцыі па працы з партнёрамі кампаніі Анастасіі Юдзінай, заключыў дагавор з уладальнікам сабакі Міхаілам Ільевым, начальнікам часткі піратэхнічных работ ДУ ДСНС Чарнігаўскай вобласці. Collar выпусціла лінейку амуніцыі для хатніх жывёл HERRRO.
Кампанія «Патрон не спіць» зарэгістраваная ў жніўні 2022 года. Па даных YouControl, яе канчатковая бенефіцыярка і генеральны дырэктар — Юлія Грабянеўская. Яна таксама дырэктар у ТАА «Усё сам», якое належыць вядомаму трэвел-блогеру Антону Птушкіну.
Па словах Грабянеўскай, яна дзейнічае па даручэнні ўладальніка сабакі. Forbes не змог пацвердзіць гэтую інфармацыю — Ільеў знаходзіцца ў камандзіроўцы на размініраванні. Звязацца з ім не атрымалася. Разам з гаспадаром на размініраванне паехаў і Патрон, пра гэта распавядаецца на старонцы ў інстаграме сабакі.
Пакуль што гандлёвая марка «Сабака Патрон» ва Украіне не зарэгістравана. Ільеў падаў шэсць заявак на рэгістрацыю гандлёвай маркі ва Укрпатэнт, першая пададзеная ў маі мінулага года. «Па аптымістычным сцэнары, маркі па самых ранніх заяўках будуць зарэгістраваныя не раней канца 2023 года», — кажа партнёр юрыдычнай фірмы Axon Partners Міхаіл Юдзін.
Сама кампанія не атрымлівае нічога ад продажу аўтарскіх правоў, кажа Грабянеўская. Паводле яе, усё, што зарабляе Патрон, ідзе на дабрачыннасць.
У прыватнасці, Collar накіроўвае ліцэнзійны прыбытак у Фонд дапамогі жывёлам UAnimals. У фондзе гэта пацвярджаюць. Па словах дырэктара па партнёрстве і фандрайзінгу гэтай арганізацыі Валянціны Таркоўскай, UAnimals атрымаў «ад Патрона» каля мільёна грыўняў. Гэтыя грошы паступілі ад Collar і службы таксі Uklon, якая прыцягвала сабаку да дабрачыннай акцыі.
У WP Merchandise Forbes кажуць, што львіная доля прыбытку пойдзе на дапамогу сапёрам і жывёлам. «Па ўмовах кантракта, мы не можам выдаваць гэтую інфармацыю», — распавяла дырэктар па маркетынгу WP Merchandise Ірына Тыміна.
«Зрабіў тата» размяшчае малюнак сабакі на цацках бясплатна, па дамоўленасці з «Патрон не спіць». Аднак, як кажа сузаснавальніца кампаніі Марыя Гром, 10% прыбытку яна пераводзіць УСУ.
Акрамя гэтага, «Укрпошта» выпусціла марку з выявай Патрона. Маржа з продажу пайшла на дабрачыннасць, за пяць месяцаў аператар перавёў 16 мільёнаў грыўняў, паведамляюць у прэс-службе кампаніі. Частка з іх будзе накіравана на закупку машыны для размініравання.
Яшчэ частка ўжо накіравана на набыццё вакцын, кармоў і будак для прытулкаў і цэнтраў абароны і рэабілітацыі жывёл. Сярод такіх прытулкаў — Best Friends у Макараве, Gostomel Shelter у Гастомелі і «Шчаслівы сабака» ў Крапіўніцкім. У Макараўскім прытулку Forbes распавялі, што за паступленні ад «Укрпошты» набылі для жывёл ежу, вакцыны і лекі.
Манетызацыю Грабянеўская разлічвае атрымаць на мультсерыяле пра Патрона. Ён выйшаў 7 студзеня на MEGOGO і YouTube-канале Патрона. У першым сезоне 11 серый па 3-4 хвіліны. Першая серыя ўжо набрала амаль 150 000 праглядаў. Праект фінансавала Агенцтва ЗША па міжнародным развіцці (USAID). Грошы ад серыяла, якія каманда можа атрымаць за прагляд на YouTube, плануюць укласці ў наступны сезон, кажа генеральны дырэктар «Патрон не спіць».
Каментары