На пачатку чэрвеня падчас арніталагічнай экспедыцыі на балоце Званец нямецкі навуковец Йенс Клінкер убачыў драфу. Гэта можа стаць сапраўднай сенсацыяй — Беларусі гэтых птушак не бачылі ад 1965 году.
На пачатку чэрвеня падчас арніталагічнай экспедыцыі на балоце Званец нямецкі навуковец Йенс Клінкер убачыў драфу. Гэта можа стаць сапраўднай сенсацыяй — Беларусі гэтых птушак не бачылі ад 1965 году.
Паводле словаў арнітолага, адбылося гэта дзесьці паміж Брэстам і Бярозай, назваць месца больш дакладна ён не здолеў. Паведамленне нямецкага арнітолага успрынялі па рознаму. Доказаў жа няма, нават фотаздымку. Аднак мясцовыя арнітолагі ў большасці сваёй давяраюць немцу. Бо ён па-за межамі нашай краіны бачыў дрофаў неаднакроць. І ўпэўнены ў тым, што і зараз не памыліўся. Здолеў нават з акна цягніка на адлегласці 100 метраў вызначыць пол: у самца карычневая спіна з пярэсцінамі, шэрыя шыя і галава.
Зблытаць драфу з іншымі прадстаўнікамі пярнатых вельмі цяжка. І па вонкавым выглядзе, і па ладзе жыцця птушка нагадвае невялікага страуса. У яе вельмі моцныя ногі, доўгая шыя, галава з кароткай дзюбай, у апярэнні спалучаюцца рудыя і белыя колеры, ад падбароддзя адыходзяць «вусы» — пучкі падоўжаных ніцепадобных пёраў. На дрэвы ніколі не сядае. Цудоўна лётае, але нават у выпадку небяспекі спрабуе спярша ўцячы і развівае пры гэтым даволі высокую хуткасць. Драфа, дарэчы, даволі вялікая птушка з сямейства журавелепадобных: у залежнасці ад полу і сезону вага яе хістаецца ад 4 да 11, а часам нават да 18 кг! Харчуецца зернем і насеннем раслінаў, любіць гарох, капусту і гарчыцу, шчыпае маладую траву. Але можа лавіць дробных сысуноў, земнаводных і некаторых бесхрыбетных, у тым ліку і жамяру.
Наагул драфа — птушка стэпавая. Але з-за значнага змяншэння тэрыторыяў стэпаў, свабодных ад сельскай гаспадаркі, колькасць птушак няўхільна скарачаецца. Яшчэ болей птушак гіне ад рук браканьераў, бо мяса дрофаў лічыцца далікатэсным. Увосень пад залевамі пёры птушкі хутка намакаць і змярзаюцца, калі адразу ж здараюцца халады. Няздольных уляцець дрофаў браканьеры забіваюць палкамі.
У апошні час гэтыя птушкі пачалі гнездавацца на палях і сенакосных участках. Магчыма, нямецкі арнітолаг стаў сапраўды першым сведкам вяртання рэдкай птушкі на Брэстчыну. У вас, паважаныя чытачы, ёсць магчымасць дазнацца праўду. Грамадская арганізацыя «Ахова птушак Бацькаўшчыны» звяртаецца да ўсіх неабыякавых назіральных людзей, якія працуюць у полі альбо проста часта там бываюць. Драфа патэнцыйна можа сустрэцца на ўсёй тэрыторыі нашай вобласці. Калі вам пашанцуе і вы ўбачыце гэтую птушку, запомніце дакладнае месца і тэрмінова паведаміце па тэлефоне 8(029)791-78-16. Найкаштоўнейшая птушка драфа мае патрэбу ў асаблівай ахове.
Каментары