Зламыснік угаварыў пажылую мінчанку перавесці 236 тысяч рублёў у іншы банк, стварыць карт-рахунак і даць яму доступ да інтэрнэт-банкінгу, паведамляе «Мінск-Навіны».
Днём 22 сакавіка 67-гадовай мінчанцы патэлефанаваў на Viber невядомы, які прадставіўся супрацоўнікам банка. Ён паведаміў, што проста цяпер з яе банкаўскай карткі ашуканцы пераводзяць грошы на іншы рахунак. Каб спыніць крадзеж, ёй неабходна ўсталяваць праграму дыстанцыйнага доступу. Пажылая жанчына адразу паправіла таго, хто тэлефанаваў, патлумачыўшы, што ў яе ёсць банкаўскі рахунак, а не карта. На што нібыта прадстаўнік банка пачаў пераконваць, што зафіксаваныя несанкцыянаваныя аперацыі і што ў хуткім часе з ёй звяжуцца супрацоўнікі міліцыі.
І сапраўды, праз некалькі дзён пенсіянерцы зноў на Viber пачаў тэлефанаваць нібыта прадстаўнік праваахоўных органаў. Ён пацвердзіў словы чалавека, які раней тэлефанаваў, і параіў, каб жанчына зняла з рахунку грошы і залічыла іх на карт-рахунак іншага банка.
«Праваахоўнік» змог пераканаць жанчыну, і яна, кіруючыся яго інструкцыям, у некалькі этапаў зняла з рахунку грошы і залічыла на рахунак, які ёй параілі зламыснікі. Больш за тое, яна перадала ім даныя для ўваходу ў праграму. Дыстанцыйны доступ дазволіў ашуканцам даведацца рэквізіты банкаўскай карты, аўтарызавацца ад імя мінчанкі ў асабістым кабінеце інтэрнэт-банкінгу і дыстанцыйна распараджацца грашыма. У выніку з карт-рахунку пенсіянеркі выкрадзена больш за 236 тысяч рублёў. Аказваецца, нядаўна жанчына прадала кватэру і паклала ўсю суму на рахунак.
Каментары