Тры кароткія ВІДЭА, якія дадуць вам адчуць атмасферу мітынгу ў Гомелі
Чатырохдзённае турнэ па Віцебшчыне, Магілёўшчыне і Гомельшчыне кандыдатка ў прэзідэнты Святлана Ціханоўская завяршыла ў горадзе над Сожам. На мітынг там сабраліся больш за 10 тысяч чалавек. Гэта найбольшы палітычны сход тут за апошнія дзесяцігоддзі.
Вось як выглядаў мітынг у Гомелі. Глядзіце кароткія відэа:
«Добры дзень, родны Гомель Сяргея Ціханоўскага!» — так распачала свой выступ Святлана Ціханоўская.
«Тое, што я стаю на гэтым месцы, заслуга майго мужа Сяргея Ціханоўскага», — сказала яна. Людзі адказалі скандаваннем «Сяргей! Сяргей!»
Нідзе раней Святлана Ціханоўская не выступала так пранікнёна, як у Гомелі.
«Малайчына! Моцная жанчына!» — сказала карэспандэнту «Нашай Нівы» ўдзельніца мітынгу Ірына, доктар-тэрапеўт.
З пятніцы да нядзелі Ціханоўская ў суправаджэнні прадстаўнікоў штабоў Віктара Бабарыкі і Валерыя Цапкалы, а таксама паплечнікаў Паўла Севярынца праводзіла па тры сустрэчы ў дзень. У пятніцу — Глыбокае, Наваполацк, Віцебск. У суботу — Орша, Магілёў, Бабруйск. Сёння — Жлобін, Рэчыца і Гомель.
Мітынг у Гомелі, як і ўсе папярэднія, прайшоў у вельмі мірнай, жыццярадаснай атмасферы. Людзі ахвотна скандавалі «Жыве Беларусь!», «Верым! Можам! Пераможам!», «Любім! Можам! Пераможам!», «Света! Света!», «Перамен», «Свабоду».
Гомель — 510-тысячны абласны цэнтр на паўднёвым усходзе Беларусі. У 1994 годзе менавіта Гомельшчына дала Лукашэнку найбольшы працэнт галасоў, большы, чым нават яго родная Магілёўшчына. І такая сітуацыя працягвалася доўга: Падняпроўе заставалася бастыёнам падтрымкі аўтарытарнага рэжыму. Як можна меркаваць па сённяшнім мітынгу, нешта памянялася.
Цяпер чытаюць
Беспілотнік, які ўпаў у Мінску, прыляцеў з боку Барысава — шматлікія сведчанні9
Каментары