У Мінску сямейную пару арыштавалі за палітыку, дома засталося іх 6-гадовае дзіця
5 чэрвеня ў двары свайго дома была затрыманая мінчанка Алена Лазарчык. Як стала вядома TUT.BY ад родных, напярэдадні яе запрашалі ў Кастрычніцкі РУУС, дзе былі звесткі, што жанчына брала ўдзел у несанкцыянаваным мерапрыемстве на Камароўцы. Алена адмовілася з'явіцца ў міліцыю без позвы, у выніку яе затрымалі. Днём раней, паведамляюць праваабаронцы, затрымалі яе мужа, дома засталося іх 6-гадовае дзіця.
Праваабаронца Аляксей Лойка распавёў, што родныя нават не адразу маглі даведацца, куды знікла Алена Лазарчык і яе муж Сяргей Мацкойць. У Савецкім, Кастрычніцкім РУУС і Цэнтры ізаляцыі правапарушальнікаў (ЦІП) адмаўляліся паведамляць інфармацыю. Пазней у ЦІП усё ж пацвердзілі, што Лазарчык і Мацкойць знаходзяцца тут. Аднак ні родныя, ні праваабаронцы па-ранейшаму не могуць высветліць, Алену і Сяргея ўтрымліваюць у ізалятары да суда або суд ужо прыняў рашэнне аб пакаранні ў выглядзе адміністрацыйнага арышту.
Праваабаронцы лічаць, што ў дзеяннях супрацоўнікаў міліцыі ёсць прыкметы перавышэння службовых паўнамоцтваў: ч.2 арт. 6.7 КаАП забараняе арыштоўваць жанчын і адзінокіх мужчын, якія маюць непаўналетніх дзяцей, сыну Алены і Сяргея шэсць гадоў.
Як стала вядома TUT.BY, хлопчык знаходзіцца з роднымі, якія сур'ёзна занепакоеныя сітуацыяй. Пры пошуках Алены і праваабаронцы, і блізкія паведамлялі ў Цэнтр ізаляцыі правапарушальнікаў, што дома застаўся яе непаўнагадовы сын.
6 чэрвеня праваабаронца Аляксей Лойка патэлефанаваў па тэлефоне даверу ГУУС Менгарвыканкама. Падпалкоўнік міліцыі Андрэй Дземідчук адказаў, што па гэтым факце трэба звярнуцца з пісьмовай заявай у МУС, пракуратуру ці ў Следчы камітэт, яны і дадуць адказ.
У прэс-службе мінскай міліцыі TUT.BY паведамілі, што ў дачыненні да Лазарчык быў складзены адміністрацыйны пратакол (парушэнне парадку арганізацыі або правядзення масавых мерапрыемстваў — арт. 23. 34 КаАП), які ў наступным быў перададзены ў суд. 5 чэрвеня суд пастанавіў прыцягнуць Алену Лазарчык да адказнасці ў выглядзе адміністрацыйнага арышту на 12 сутак. Сяргей Мацкойць па рашэнні суда таксама адпраўлены «на суткі».
Выходзіць, што пад арыштам Лазарчык і Мацкойць знаходзяцца па рашэнні суда. Ці паведамлялі яны суддзі, што дома ў іх засталося 6-гадовае дзіця, невядома, як і тое, чаму суд прыняў рашэнне пакараць бацькоў арыштам. На судзе не было ні родных, ні адвакатаў, ні праваабаронцаў.
Каментары