25 сакавіка затрымалі Яўгена Д., дырэктара вясковай школы з-пад Шаркаўшчыны.
59-гадовы Д. працаваў у школе ў вёсцы Станіславава. Педагагічны стаж — больш за 20 гадоў. Пачынаў фізруком, даслужыўся да дырэктара — пасаду кіраўніка школы заняў прыкладна 15 гадоў таму, кажуць мясцовыя.
Выкладаў Д. фізкультуру і чарчэнне.
У самой школе пацвярджаюць факт затрымання дырэктара, але каментаваць гісторыю адмаўляюцца.
Педагогі з суседніх вёсак кажуць, што Д. быў на добрым рахунку, ніякіх праблем ніколі не меў. Жыў у Шаркаўшчыне, у вёсцы толькі працаваў. Жанаты, мае дарослага сына. Жонка пенсіянерка, раней працавала ў райвыканкаме.
«Нядаўна, 23 сакавіка, Яўген пахаваў маці. Я яго бачыў на пахаванні, здаецца, ніякіх праблем не было», — распавёў «Нашай Ніве» брат дырэктара.
Але праз пару дзён Д. узялі пад варту. У Следчым камітэце пацвердзілі: мужчыну затрымалі 25 сакавіка. На яго завялі крымінальную справу, падазраюць у гвалтоўных дзеяннях сэксуальнага характару ў дачыненні да непаўналетняга.
Вядома, што пакуль пацярпелых двое. Гэта школьнікі, вучні Станіславаўскай школы.
Па інфармацыі «Нашай Нівы», адзін з пацярпелых распавёў маці, што дырэктар яго некалькі разоў «мацаў» у кабінеце. Жанчына пайшла ў міліцыю.
Прычым, па словах школьніка, упершыню дырэктар пачаў заляцацца яшчэ калі хлопчык вучыўся ў 5—6-м класе. Затым на некалькі гадоў мужчына спыніўся, і вось нядаўна ўсё пачалося ізноў.
Праўда, у гэтую гісторыю некаторыя вяскоўцы адмаўляюцца верыць.
«Ён дырэктар ад бога. Я думаю, што гэта няпраўда, — кажа адна з жыхарак Станіславава, у той самай школе ў яе вучацца дзве дачкі. — Я сама не веру ў гэта».
Старэйшая дачка суразмоўцы вучыцца ў 9 класе. Яна таксама паўтарае за маці: «І я лічу, што гэта няпраўда. Ён быў нармальны дырэктар і нармальны настаўнік, заўсёды добра ставіўся, амаль не сварыўся».
Цяпер педагогу пагражае ад 8 да 15 гадоў пазбаўлення волі.
Цяпер чытаюць
Вынеслі прысуд Паліне Зыль — блогерцы, якая стала нулявым пацыентам справы Гаюна, бо ў яе знайшлі тую самую спасылку ад Матолькі4
Каментары