Паспрабуйце ўвесці ў гугл-перакладчыку назву «рыкота», і ён перакладзе яго з італьянскай мовы як тварог. Таму год 10 таму, калі я ўпершыню пачула пра соус да макарон з рыкотай-тварагом, мой апетыт неяк пагас. Але ўпэўненасць у тым, што ў італьянскай кухні няма нясмачных страў, усё ж падштурхнуў мяне пакаштаваць pasta con ricotta. На маю радасць, страва аказалася вельмі смачная!
Праз нейкі час я усё ж даведалася, што ніякі гэта быў не тварог, а традыцыйны італьянскі свежы сыр. Рыкота гатуецца з сыроваткі пераварваннем (што і знайшло адлюстраванне ў самой назве ricotta — «перавараная») і выкарыстоўваецца для гатавання як салёных, так і салодкіх страў.
Ніжэй вы знойдзеце рэцэпт соусу для макароны з традыцыйным спалучэннем смакаў рыкота-шпінат. Смачна есці!
На 4 порцыі:
- 400 г макароны;
- 250 г рыкоты;
- 200 г вяршкоў, 20%;
- 3 зубчыкі часнаку;
- 200 г шпінату (свежы ці замарожаны);
- галінка чабору;
- соль-перац;
- аліўкавы алей;
- кедравыя арэхі і пармезан да смаку.
Макарону варым у салёнай вадзе. У гэты час гатуем соус. Дробна наразаем шпінат і часнок. Рыкоту змешваем з вяршкамі. На патэльні разаграваем алей, дадаём часнок, дамо трохі падсмажыцца. Далей дадаём шпінат, накрываем патэльню накрыўкай і пакідаем на хвілін 5 на сярэднім агні. Калі мы пабачылі, што шпінат згатаваўся (стаў мяккі і пацямнеў), дадаём рыкоту з вяршкамі. Солім і перчым, дадаём лісцікі чабору. Даём соусу закіпець, памешваючы. Калі соус стаў занадта густы, можна дадаць некалькі сталовых лыжак вады з-пад макароны.
Соус змешваем з макаронамі, пасыпаем пармезанам ці іншым вашым упадабаным цёртым сырам і кедравымі арэшкамі да смаку.
Цяпер чытаюць
Польшча прызнала Аляксандра Машэнскага непажаданай асобай34
Каментары