Паротнікаў: «Замест вучэнняў «Захад-2017» можа быць такая барацьба за мір, што…»
«Гісторыя пра 4162 вагоны для ваенных перавозак з Расіі ў Беларусь сёлета першапачаткова была з разраду «глыбока ўздыхнуць і пачакаць», — піша ў фэйсбуку кіраўнік праекта Belarus Security Blog Андрэй Паротнікаў. —
Па ўсіх правілах сучаснага інфармацыйнага грамадства, калі заўтра ніхто не ўспомніць, што было пазаўчора, гэтая тэма павінна была б даўно знікнуць з абароту. Але вось ужо трэці месяц пастаянна па гэтай нагоды адбываецца «накід на вентылятар». На мінулым тыдні свой залп свядомасці выдаў прадстаўнік украінскага бамонду, і бурленне пачалося з новай сілай.
Гледзячы на ўсё гэта, пачынаю адчуваць комплекс непаўнавартасці: пакуль людзі збянтэжаныя глабальнымі пытаннямі чарговай традыцыйнай акупацыі Расіяй Беларусі, я калупаюся з рамонтам ваннай. Напэўна, гэта таму, што я не пераношу фэнтэзі, а аддаю перавагу фактам.
А яны такія:
1. 4162 вагоны ваенных грузаў у 2017 годзе — гэта ў абодва бакі, г.зн. 2081 туды і столькі ж назад.
2. Параўнанне тэндару МА РФ 2016 года з папярэднімі гадамі недарэчнае, бо ў гэты раз яны загналі на тэндар усе меркаваныя аб'ёмы перавозак, а ў мінулыя гады па конкурсе закуплялася толькі нязначная частка транспартных паслуг.
3. У Маскве кажуць, што такім чынам (закупляючы ўвесь аб'ём чыгуначных перавозак па тэндары) яны робяць закупкі празрыстымі і канкурэнтнымі, змагаюцца з карупцыяй і эканомяць бюджэтныя грошы. У Мінску падазраюць, што гэта зроблена наўмысна, як элемент інфармацыйнай правакацыі з мэтай пасеяць недавер да беларускіх уладаў з боку Захаду і Украіны.
4. 2081 вагон у адзін бок, гэта ўсё роўна шмат, больш, чым у папярэднія гады. Гэтым «вагонапаркам» можна перавезці дзве поўныя мотастралковыя брыгады з абозамі і запасамі.
5. Самому «Захаду-2017» будзе папярэднічаць шэраг больш дробных двухбаковых вучэнняў, якія і «зжаруць» значную частку меркаванага аб'ёму чыгуначных перавозак. Г. зн. у «Захадзе» з расійскага боку будзе ўдзельнічаць сукупна каля 1 брыгады.
6. На сённяшні дзень «Захад» бачыцца з Мінска як вучэнні дывізіённага ўзроўню з максімальным лікам удзельнікаў да 13 тыс. чалавек ад абодвух бакоў. Г. зн. ніякую ні 1-ю танкавую, ні 128 акопна-тачаначную армію ў Беларусі не чакаюць.
7. І ў завяршэнне — імавернасць таго, што «Захад-2017» адбудзецца, вельмі вялікая. Але ўжо не абсалютная. Калі вучэнні па нейкай зручнай прычыне не адбудуцца, то далёка не ўсe ў Мінску будуць здзіўленыя. Але адмова ад «Захаду» будзе заканамерна азначаць перарастанне беларуска-расійскіх палітыка-эканамічных супярэчнасцяў у поўнамаштабны канфлікт, пасля якога можа пачацца «такая барацьба за мір, што каменя на камені не застанецца». У пераносным, вядома, значэнні. Час для бадання з Крамлём цяпер не лепшы. Будзем спадзявацца, што ў аднаго ўсім вядомага персанажа нервы акажуцца мацнейшымі, чым вечарам 19 снежня 2010 года».
Каментары