18-гадовая сьпявачка прэзэнтуе на Tuzin.fm EP «Усё атрымаецца», у які ўвайшлі тры кампазыцыі яе аўтарства.
Адэля кажа, што яна ўжо даўно піша песьні, некаторым яе творам чатыры і болей гадоў. Але толькі цяпер яна вырашыла абвесьціць публічна пра сваю творчасьць. «Пісала песьні я для сябе і не зьбіралася выкладаць іх у інтэрнэт. Але нядаўна вырашыла, што павінна падзяліцца сваім сьветапоглядам зь людзьмі. Таму паступова запісваюся», – распавяла сьпявачка Tuzin.fm з нагоды прэм’еры. Матэрыялу набіраецца на паўнавартасны альбом, які Адэля мяркуе неўзабаве выдаць. А пакуль яна прэзэнтуе першыя тры запісаныя творы – «Усё атрымаецца», «Адэлька-сардэлька» і «Цудоўны сьвет». Музыка і словы належаць аўтарству Адэлі.
«Я натхняюся звычайнымі паўсядзённымі сытуацыямі, – распавядае сьпявачка. – Напрыклад, «Усё атрымаецца» была напісана падчас майго прабуджэньня ў сонечны дзень – я адчула неапісальную радасьць і зразумела, што як бы не было складана, усё адно ўсё атрымаецца, калі чалавек насамрэч гэтага вельмі хоча. Таксама на гэтую песьню паўплывла мая любоў да людзей. Людзі мяне вельмі натхняюць: іх позіркі, жэсты, манера размовы і энэргэтыка».
Песьня «Адэлька-сардэлька» – адна з даўнейшых. Яна зьявілася ў 2012 годзе. «Стварыла я яе, калі ўва мне прачнуласа вострае жаданьне – быць заўсёды маленькай дзяўчынкай. А вырашыла назваць яе так, таму што такой мянушкай называў мяне тата ў дзяцінстве, і я заўсёды злавалася, калі ён мяне так называў, бо лічыла, што ён мяне абражае. Але зараз гэтая мянушка для мяне, як цёплы ўспамін з дзіцячых часоў майго жыцьця».
Трэцюю кампазыцыю – «Цудоўны сьвет» Адэля напісала пасьля шпацыру па горадзе: «Вельмі люблю гуляць на самоце і насычацца звычайнымі прыроднымі зьявамі: сонейкам, ветрам, дажджом і г.д. Падчас такіх шпацыраў я адчуваю сябе вельмі шчасьлівай, бо разумею, што наш сьвет цудоўны».
Пакуль музычны праект Адэлі Вольскай існуе ў студыйным фармаце. Жывыя выступы не плянуюцца.
Цяпер чытаюць
Міністр культуры выцягнуў у эфір чарговага Астапа Бэндара. І гэта стала апошняй кропляй: супраць гэтага фермера-хвалька выступіла сям’я3
Каментары