У Менску адчынілася выстава самага знакамітага грузінскага мастака. Карціны аўтара, які паслужыў прататыпам для песьні «Мільён пунсовых ружаў», можна будзе бачыць тры месяцы.
Выстава жывапісу выдатнага грузінскага мастака Ніко Пірасмані (Мікалай Пірасманішвілі, 1862—1918) адкрылася 30 мая ў Нацыянальным мастацкім музеі ў Мінску.
У экспазіцыі прадстаўлены 24 работы майстра са збору Нацыянальнага музея Грузіі, у якім захоўваецца 160 твораў мастака. Сярод іх найбольш вядомыя палотны Н.Пірасмані, у тым ліку «Дзяўчынка з паветраным шарам», «Леў і сонца» і «Артачальскія прыгажуні», а таксама сюжэтныя карціны, якія перадаюць атмасферу жыцця Грузіі ў пачатку мінулага стагоддзя.
Паводле слоў пасла Грузіі ў Беларусі Давіда Залкаліяні, геній Н. Пірасмані быў прызнаны толькі пасля яго смерці. Дыпламат паведаміў, што першая выстава майстра, пасля якой яго творчасць набыла сусветную вядомасць, адбылася ў Маскве ў 1913 годзе. Пасол выказаў спадзяванне, што цяперашняя творчая акцыя будзе пачаткам шырокага супрацоўніцтва дзвюх краін у галіне культуры.
Прафесар Беларускай дзяржаўнай акадэміі мастацтваў, заслужаны дзеяч мастацтваў Беларусі Уладзімір Тоўсцік зазначыў, што Н. Пірасмані ўвасабляе зямлю не толькі Грузіі, але ўсяго Каўказа. Паводле яго слоў, карціны мастака-самавука прасякнуты духам каўказскай гасціннасці, шчодрасці і прастаты ў зносінах, шчырасцю і любоўю.
У інтэрв'ю БелаПАН дырэктар музея Уладзімір Пракапцоў выказаў удзячнасць дырэктару Нацыянальнага музея Грузіі Давіду Лардкіпанідзэ за магчымасць пазнаёміцца з мастацтвам Н. Пірасмані, а таксама паведаміў, што на 8 жніўня запланавана падпісанне дагавора аб супрацоўніцтве двух музеяў. «Мы дамовіліся аб абмене не толькі карцінамі з фондаў музеяў, але і карцінамі сучасных беларускіх і грузінскіх мастакоў, тым больш што Мінск і Тбілісі звязаны прамым авіярэйсам, які дазваляе нам спрасціць праблему дастаўкі твораў. Апрача таго, у нас з'явіўся цудоўны партнёр — Грузінскі народны банк, які набыў 70 % акцый Беларускага народнага банка 0187, — зазначыў У. Пракапцоў.
Выстава будзе працаваць да 13 жніўня.
Каментары