Уладзімір Макей і Дзмітрый Кісялёў абмеркавалі працу карпункта «Россія сегодня»
Мінск, 6 красавіка. Міністр замежных спраў Беларусі Уладзімір Макей 6 красавіка сустрэўся з генеральным дырэктарам міжнароднага інфармагенцтва «Россия сегодня» Дзмітрыем Кісялёвым, які прыбыў у Мінск.
Як паведамляе прэс-служба беларускага МЗС, на сустрэчы абмяркоўвалася супрацоўніцтва ў рамках інфармацыйнай прасторы Саюзнай дзяржавы, а таксама пытанні, якія тычацца працы карпункта МІА «Россия сегодня» ў Беларусі.
Макей заявіў, што МЗС адкрытае для ўзаемадзеяння з прадстаўнікамі СМІ, у тым ліку з супрацоўнікамі інфармагенцтва «Россия сегодня». У сваю чаргу Кісялёў падкрэсліў, што агенцтва зацікаўленае ў асвятленні падзей, якія адбываюцца ў Беларусі, а таксама ў супрацоўніцтве з беларускімі дзяржаўнымі органамі і СМІ «як у двухбаковым фармаце, так і ў кантэксце інтэграцыйных аб'яднанняў».
7 красавіка Дзмітрый Кісялёў возьме ўдзел у адкрыцці мультымедыйнага прэс-цэнтра Sputnik у Мінску, фотавыставе «Інтэграцыя ў асобах», прысвечанай 20-годдзю падпісання дамовы аб утварэнні Саюзнай дзяржавы Беларусі і Расіі, і дасць прэс-канферэнцыю.
Дазвол на працу ў Беларусі карпункт МІА «Расія сёння» атрымаў у канцы 2014 года. Неўзабаве ў Мінску пачала працу беларуская рэдакцыя створанага агенцтвам навіновага праекта пад назвай Sputnik.
Міжнароднае інфармацыйнае агенцтва «Россия сегодня» створанае ў снежні 2013 года на базе інфармагенцтва РІА Новости згодна з указам прэзідэнта Уладзіміра Пуціна. Асноўным напрамкам дзейнасці агенцтва з'яўляецца асвятленне дзяржаўнай палітыкі Расіі і расійскага грамадскага жыцця за мяжой. Гендырэктарам новага агенцтва быў прызначаны вядучы тэлеканала «Россия 1» Дзмітрый Кісялёў, вядомы сваёй праўладнай пазіцыяй, а таксама адыёзнымі рэпартажамі, у тым ліку пра апошнія падзеі ва Украіне.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА8
Каментары