Грамадзяне будуць атрымліваць грошы за дапамогу ў барацьбе з карупцыяй, гаворыцца ў пастанове Савета Міністраў №101 ад 5 лютага 2016 года, паведамілі ў прэс-службе беларускага ўрада.
«Выплата ўзнагароджання і іншых выплат фізічнай асобе, якая спрыяе выяўленню карупцыі, праводзiцца ў выпадках: падачы інфармацыі, прадметаў і дакументаў, якія садзейнічалі выяўленню карупцыйнага злачынства; падачы звестак пра месцазнаходжанне асобы, якая знаходзіцца ў вышуку за карупцыйнае злачынства; падачы інфармацыі пра месцазнаходжанне грашовых сродкаў i iншай маёмасцi, атрыманых у выніку здзяйснення карупцыйнага злачынства; садзейнічання прадухіленню або кампенсацыі шкоды, нанесенай карупцыйным злачынствам; аказання іншага садзейнічання органам крымінальнага пераследу, які меў значэнне для процідзеяння карупцыйным злачынствам», — сказана ў дакуменце.
Калі гаворка ідзе пра цяжкае ці асабліва цяжкае злачынства, то выплачваецца да 50 базавых велічынь, менш цяжкае — да 30 базавых.
«Робяцца выплаты кампенсавальнага характару да 10 базавых велічынь на падставе дакументаў, якія пацвярджаюць зробленыя фізічнай асобай выдаткі», — адзначаецца ў дакуменце. Выплата прызначаецца пракуратурай на падставе хадайніцтва органа крымінальнага пераследу пры прыняцці рашэння па крымінальнай справе, што паступіла для накіравання ў суд і ў некаторых іншых выпадках.
Пад фізічнымі асобамі тут не маюцца на ўвазе тыя, хто з'яўляецца вайскоўцамі або супрацоўнікамі дзяржорганаў і іншых арганізацый, якія змагаюцца з карупцыяй. Не распаўсюджваецца дзеянне дакумента і на ўдзельнікаў працэсу пры расследаванні па крымінальных справах.
«Выплата ўзнагароджання і іншых выплат не робіцца фізічным асобам, якія аказваюць садзейнічанне ў выяўленні, спыненні, раскрыцці або расследаванні карупцыйнага злачынства, у здзяйсненні якога яны ўдзельнічалі», — падкрэсліваецца ў пастанове.
Цяпер чытаюць
Вандроўнік і бізнэсовец з Мінска за два дні знайшоў сабе праз сацсеткі нявесту — найбольш спадабалася дзяўчына з Расіі27
Каментары