Яшчэ адна крымінальная справа па выніках мітынгу прадпрымальнікаў 10 студзеня
Актывіст арганізацыі АГП »Маладыя дэмакраты» Міхаіл Крываў прызнаны падазраваным па крымінальнай справе аб падзеях 10 студзеня ў Менску.
Як паведаміла БелаПАН супрацоўніца прэс‑службы АГП Наталля Валакіда, М.Крываў быў выкліканы позвай, якую яму ўручыў участковы позна вечарам 25 лютага. М.Крываў з’явіўся ў следчае ўпраўленне, дзе яму аб\’явілі аб яго статусе падазронага ў здзяйсненні злачынства, прадугледжанага часткай 1 артыкула 342 Крымінальнага кодэкса Беларусі (арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх).
«Пастанову аб прызнанні М.Крывава падазроным падпісаў начальнік аддзела СУПР ГУУС Мінгарвыканкама падпалкоўнік Павел Міхалькевіч і ўзгадніў пастанову з начальнікам следчага ўпраўлення Генадзем Казакевічам. Аднак Міхаіл заявіў аб тым, што допыт можа працягвацца толькі ў прысутнасці адваката, папрасіў выклікаць адваката Аляксандра Галіева і чакае яго прыезду», — паведаміла Н.Валакіда.
Згодна з КК Беларусі, частка 1 арыткула 342 прадугледжвае пакаранне ў выглядзе штрафу, або арышту на тэрмін да 6 месяцаў, або абмежаванне волі да трох гадоў, або пазбаўленне волі на той жа тэрмін.
Як паведаміла Н.Валакіда, яшчэ адзін маладзёжны актывіст, член БСДП (Грамада) Аляксандр Стральцоў не змог 26 лютага прыехаць у следчае ўпраўленне з‑за хваробы. Ён таксама быў выкліканы на допыт у якасці падазронага па крымінальнай справе, што распачата паводле падзей 10 студзеня.
Нагадаем, у акцыі пратэсту прадпрымальнікаў 10 студзеня ўзялі ўдзел больш за тры тысячы чалавек, з іх 27 былі затрыманыя і 23 — асуджаныя. Мітынгоўцы выступалі супраць падпункта 1.1 указа прэзідэнта № 760 ад 29 снежня 2006 года, які дазваляе ІП наймаць на працу толькі блізкіх сваякоў. У ходзе правядзення акцыі на некаторы час быў перакрыты рух на праспекце Незалежнасці. Па факце «масавых беспарадкаў у цэнтры Мінска» была распачата крымінальная справа.
62‑гадовая бізнэсвумэн і мільянерка Ірына Цярэшчанка падзялілася гісторыяй свайго кахання з мужчынам, на 20 гадоў малодшым за яе6
Каментары