Выкарыстанне гамеапатычных прэпаратаў назвалі небяспечным для здароўя пры ўмове адмовы ад лекавання.
Нацыянальная рада па здароўі і медыцынскіх даследаваннях Аўстраліі (NHMRC) прызнала лекаванне гамеапатычнымі прэпаратамі неэфектыўным, паведамляе The Guardian.
NHMRC прааналізавала 225 публікацый і прыйшла да высновы аб тым, што «не існуе стану здароўя, для якога было бы сведчанне аб эфектыўнасці гамеапатыі».
«Тыя, хто абіраюць гамеапатыю, рызыкуюць здароўем, калі адмаўляюцца ад лекавання», — заключылі навукоўцы.
NHMRC разглядала і публікацыі, у якіх сцвярджалася эфектыўнасць гамеапатычных прэпаратаў, але ў іх знайшліся сур’ёзныя памылкі ў метадах даследавання.
Паводле заявы Асацыяцыі гамеапатыі Аўстраліі, каля мільёна аўстралійцаў карысталіся гамеапатычнымі сродкамі. Згодна з аналізам Сусветнай арганізацыі аховы здароўя, на 2009 год аўстралійцы трацілі на гамеапатыю 9,59 млн даляраў штогод.
***
Гамеапатыя — від альтэрнатыўнай медыцыны, лекаванне паводле псеўданавуковага метаду «падобнае падобным». У гамеапатычных прэпаратах актыўныя рэчывы разбаўляюцца да звышнізкіх канцэнтрацый, нібы пакідаючы ў вадкасці «памяць» аб арыгінальным рэчыве.
Сусветная арганізацыя аховы здароўя засцерагае ад лекавання гамеапатыяй. Гамеапатыя была ў 2010 годзе адхіленая як методыка лекавання ў Вялікабрытаніі.
У Беларусі гамеапатыя дазволеная. У 2014 годзе Мінздароў дазволіў прадаваць гамеапатычныя сродкі без рэцэпту.
Каментары