Крылатыя забойцы савецкіх танкаў вяртаюцца ў Еўропу, каб супрацьстаяць РФ
Самыя небяспечныя лятучыя ворагі савецкіх наземных войскаў часоў Халоднай вайны зноў будуць базіравацца на еўрапейскіх базах, каб прадэманстраваць Маскве гатоўнасць ЗША абараняць сваіх саюзнікаў па НАТА.
Пра вяртанне цяжкаўзброеных і браніраваных штурмавікоў А-10 у Еўропу паведаміў сайт Паветраных сіл ЗША ў Еўропе usafe.af.mil.
Упершыню ў Еўропе яны з'явіліся больш за 30 год таму, і галоўнай мэтай гэтых самалётаў заўсёды былі ўдары па танкавых калонах савецкіх войскаў, калі тыя паспрабуюць атакаваць еўрапейскія краіны.
Цяпер адпраўка 12 машын у Еўропу служыць хутчэй дэманстрацыяй — яна мусіць «запэўніць нашых саюзнікаў і партнёраў у тым, што падтрыманне бяспекі ў Еўропе з'яўляецца для нас прыярытэтам», адзначыў генерал-лейтэнант Паветраных сіл ЗША Том Джонс.
А-10 — двухматорны самалёт, які мае невысокую хуткасць і вышыню палёту, але добра манеўруе і надзейна абаронены бранёй. Машына узброеная магутнай шасцірульнай 30 мм пушкай GAU-8 Avenger з хуткасцю стральбы 3900 стрэлаў у хвіліну. Хуткасць снарадаў пушкі пры пакіданні рулі — 1070 м/с, што дазваляе ёй падбіваць і знішчаць пры атаках зверху і з кармы нават сучасныя танкі.
Таксама А-10 можа несці шмат розных тыпаў ракет і бомб, найбольш вядомыя з якіх — тактычныя ракеты паветра-зямля AGM-65 Maverick з лазернымі, электронна-аптычнымі і інфрачырвонымі сістэмамі навядзення.
А-10 паступіў на ўзбраенне ў 1977 годзе, і ягоным бліжэйшым аналагам з'яўляецца савецкі штурмавік Су-25, які выкарыстоўваўся Ваенна-паветранымі сіламі СССР з 1981 года і дагэтуль стаіць на ўзбраенні РФ і постсавецкіх краін. Аднак, калі савецкая машына можа браць на борт каля 5200 кг снарадаў, ракет і бомб, то амерыканскі штурмавік — амаль у 1,5 раза болей.
Арыштаваны 75‑гадовы Зміцер Санько — ветэран-выдавец3
Каментары