Тhe Nature Methods journal публікуе справаздачу каманды неўролагаў University College London, якія навучыліся здымаць інфармацыю з асобных нейронаў, выкарыстоўваючы ўспышкі святла як стымулятар.
З пэўным дапушчэннем можна сказаць, што навукоўцы навучыліся выклікаць пэўную «думку» мышэй шляхам падбору знешняга раздражняльніка.
Тэхналогія дазваляе выбарачна стымуляваць асобныя нейроны мозга ў розных спалучэннях і ацаніць адказ. Старэйшы аўтар Майкл Хосэр, прафесар неўралогіі ў Інстытуце медыка-біялагічных даследаванняў Вольфсана, сцвярджае, што такая зваротная сувязь дазваляе даследаваць працу мозга. «Гэтак жа, як мы аб'яднаем пэўныя словы ў сказы, якія выклікаюць адказ ад таго, каму мы гаворым, так і з дапамогай святла мы актывуем пэўныя камбінацыі нервовых клетак у інтактным мозгу і запісваем рэакцыю іншых клетак».
Навукоўцы навучыліся стымуляваць адныя і тыя ж групы нейронаў у мышэй і цягам некалькіх тыдняў запісвалі і аналізавалі рэакцыю мозга. Дзеля кантролю стымуляваліся і групы нейронаў, якія рэагуюць на дотык. У кожным выпадку раздражненне абмежаванай групы клетак выклікала комплексную рэакцыю соцень суседніх нейронаў. Перавага метаду ў тым, што ён не патрабуе аператыўнага ўмяшання: мозг застаецца незакранутым, інтактным, таму рэакцыі нічым не скажаюцца, а сам эксперымент фактычна не ўплывае на здароўе паддоследных.
Даследчыкі ўпэўненыя, што працяглыя эксперыменты ў гэтым напрамку дазволяць «узламаць код» пачуццяў, зразумець, як мозг апрацоўвае інфармацыю і прымае рашэнні. У будучыні стане магчымым аналіз працэсаў, якія адбываюцца ў хворым мозгу, а таксама асаблівасцяў адчування ў аўтыстаў і людзей з замаруджаным псіхічным развіццём.
Каментары