Міністэрства гандлю: у Мінску недахоп рэстаранаў з беларускай нацыянальнай кухняй
Навучальныя семінары і майстар-класы па прыгатаванні страў беларускай нацыянальнай кухні будуць арганізаваны для работнікаў рэстараннага бізнесу Беларусі, перш за ўсё сталіцы.
Паведаміў міністр гандлю Валянцін Чаканаў у час калегіі на тэму «Аб рабоце прадпрыемстваў грамадскага харчавання Мінска».
Паводле даных Мінгандлю,
цяпер у Мінску адзначаецца недахоп аб'ектаў, якія спецыялізуюцца на прыгатаванні страў беларускай нацыянальнай кухні і адлюстроўваюць каларыт культуры праз афармленне інтэр'ера, арганізацыю абслугоўвання і г.д.
На тэрыторыі рэспублікі, у прыватнасці, налічваецца амаль 200 такіх устаноў, у Мінску іх толькі 40.
Акрамя таго, назіраецца тэндэнцыя да адкрыцця ў Мінску аб'ектаў рэстараннага бізнесу, яны ў ліку агульнадаступных аб'ектаў складаюць больш як 57 працэнтаў. Пры гэтым у сталіцы недастаткова аб'ектаў хуткага абслугоўвання, якія нацэлены на продаж страў па нізкім кошце. І цяпер у Мінску функцыянуюць толькі 385 такіх устаноў, тады як у Брэсцкай вобласці іх 426, у Гомельскай — 545.
«Хоць работа сферы грамадскага харчавання Мінска апошнім часам выклікае ў работнікаў гандлёвага ведамства шмат пытанняў, якія патрабуюць вырашэння, варта адзначыць, што за апошнія гады сетка грамадскага харчавання сталіцы істотна змянілася», — сказаў міністр. У прыватнасці, адкрыліся новыя аб'екты, якія вызначаюцца цікавай канцэпцыяй, дызайнам, асартыментам прапануемых страў і паслуг. У гэтым годзе адкрыты ўжо 192 установы на 7,5 тыс. месц.
«Уменне працаваць і высокі ўзровень абслугоўвання сталічнае грамадскае харчаванне прадэманстравала пры арганізацыі харчавання ўдзельнікаў і гасцей чэмпіянату свету па хакеі»,
— падкрэсліў Валянцін Чаканаў.
Удзел у пасяджэнні калегіі прынялі прадстаўнікі дзяржаўных органаў (міністэрстваў гандлю, па падатках і зборах, аховы здароўя, Нацыянальнага банка) і кіраўнікі арганізацый грамадскага харчавання. У час сустрэчы адбыўся канструктыўны дыялог паміж органамі дзяржкіравання і прадстаўнікамі прыватнага бізнесу.
Цяпер чытаюць
Арыштаваны 75‑гадовы Зміцер Санько — ветэран-выдавец1
Каментары