Лукашэнка: Хопіць пасіўнічаць і енчыць

На пасяджэнні Савета бяспекі аб праблемных пытаннях сацыяльна-эканамічнага развіцця краіны 17 чэрвеня Аляксандр Лукашэнка запатрабаваў забяспечыць якасны рост эканомікі і павышэнне дабрабыту грамадзян. 

Як паведамляе прэс-служба прэзідэнта, адкрываючы пасяджэнне, кіраўнік дзяржавы заявіў, што пра сур'ёзную станоўчую дынаміку гаварыць яшчэ рана. Нягледзячы на прырост ВУП крыху больш за 1% у студзені—красавіку 2014 года, канчатковыя высновы рабіць яшчэ рана, паколькі прайшло занадта мала часу, адзначыў Лукашэнка. 

«Тым больш што гэта павелічэнне атрымана за кошт рознічнага і аптовага гандлю, транспарту і будаўніцтва. Як вы ведаеце, завершаны шэраг маштабных праектаў па мадэрнізацыі энергетыкі. Такім чынам, рост ВУП забяспечаны галоўным чынам унутраным попытам», — сказаў Лукашэнка. «А вось застарэлыя болькі ў прамысловасці і сельскай гаспадарцы засталіся. Там пакуль — зніжэнне вытворчасці, значныя складскія запасы, пагаршэнне фінансавага стану арганізацый і гэтак далей. Гэтыя праблемы не раз агучваліся, і іх абавязкова трэба вырашаць», — падкрэсліў кіраўнік дзяржавы. 

Паводле яго меркавання, цяпер важная «правільная ацэнка сітуацыі, каб, сканцэнтраваўшы сілы на прыярытэтных кірунках, забяспечыць якасны рост эканомікі, павышэнне дабрабыту нашых грамадзян». 

Як адзначыў Лукашэнка, для дасягнення гэтых мэт Беларусь удзельнічае ў стварэнні Еўразійскага эканамічнага саюза. «Галоўнае тут, што ўмовы па газе зразумелыя, мы фактычна пралангуем сённяшнюю прымальную для нас цэнавую сітуацыю. Па нафце таксама дамовіліся: колькі зможам перапрацаваць — гэтулькі атрымаем. Плюс паўтара мільярда долараў вывазных пошлін, якія раней пералічваліся ў расійскі бюджэт, застаюцца ў нашым бюджэце», — сказаў афіцыйны лідар. 

Паводле яго слоў, інстытуты і механізмы саюза «дазваляюць прымаць выгадныя для нас рашэнні і не прымаць нявыгадныя, а таксама забяспечваць кантроль іх выканання». «Зараз трэба нарошчваць нашу прысутнасць на агульным рынку, а не пасіўнічаць і енчыць аб тым, што нібыта вырасла канкурэнцыя», — падкрэсліў Лукашэнка. 

Звяртаючыся да ўдзельнікаў пасяджэння, кіраўнік дзяржавы запатрабаваў даць адказы на шэраг асноўных пытанняў, і ў прыватнасці ці атрымалася прайсці ніжні пункт у траекторыі развіцця, калі адновіцца значны ўздым эканомікі і што неабходна зрабіць, каб не паўтарылася зноў сітуацыя, якая прывяла да праблем. «У нас павінна адбыцца прынцыповая, самакрытычная, проста мужчынская гутарка па найболей актуальных тэмах, якімі найбліжэйшым часам нам трэба шчыльна заняцца ў эканоміцы і ў сацыяльнай палітыцы», — дадаў кіраўнік дзяржавы. 

Па выніках нарады Лукашэнка даў адпаведныя даручэнні, адзначылі ў прэс-службе.

• 0
• 0
• 0
• 0
• 0
• 0
• 0
• 0