Манапольны апэратар нафтатранспартнай сыстэмы «Укртранснафта» зьбіраецца прапанаваць Беларусі, Расеі і Казахстану прывязаць тарыфы на транзыт нафты да яе каціровак.
Манапольны апэратар нафтатранспартнай сыстэмы «Укртранснафта» зьбіраецца прапанаваць Беларусі, Расеі і Казахстану прывязаць тарыфы на транзыт нафты да яе каціровак.
Экспэрты мяркуюць, што ініцыятыва «Укртранснафты», калі яна знойдзе падтрымку, прывядзе да падвышэньня коштаў на паліва, паведамляе ўкраінскі «Коммерсант». Іншымі словамі выдаткі за транзыт нафты па новых тарыфах лягуць на спажыўцоў. Сваю прапанову старшыня ўкраінскай кампаніі Ігар Кірушын тлумачыць тым, што на тле рэкорднага росту цэнаў на нафту на сусьветных рынках цана транспарціроўкі сыравіны не адпавядае сусьветным тэндэнцыям. Таксама з дапамогай гэтага праекту кампанія спадзяецца атрымаць дадатковыя сродкі на мадэрнізацыю нафтатранспартнай сыстэмы Ўкраіны. Паводле словаў сп. Кірушына, «Укртранснафта» з расейскай «Транснафтай» маюць утварыць сумесную працоўную групу, а непасрэдна пытаньне неабходнасьці прывязкі тарыфаў на транзыт нафты да яе каціровак будзе разгледжаны 14 лістапада ў часе сустрэчы кіраўніцтва кампаніяў.
Тым часам экспэрты з сумневам ставяцца да ініцыятывы ўкраінскага манапаліста. Так, аналітык ІК Concorde Capital Уладзімер Несьцярэнка лічыць, што Расея, Беларусь і Казахстан хутчэй за ўсё не пагодзяцца з прапановай Украіны. Ён ня раіць блытаць тарыф на транспарціроўку, які зьяўляецца ўсяго толькі цаной паслугі ды іншыя падаткі, якія трапляюць у бюджэты вышэйпамянёных краінаў.
У сваю чаргу намесьнік кіраўніка кампаніі «Укрнафтахімперапрацоўка» Віталь Давій адзначыў, што пры росьце тарыфу на транспарціроўку нафты нафтаздабываючыя кампаніі змогуць перакласьці выдаткі на цану сыравіны для нафтаперапрацоўчых заводаў. Што, безумоўна, паспрыяе росту цэнаў на паліва. Пра намер узьняць цэны на бэнзін у выпадку росту цаны транспарціроўкі сыравіны паведаміў кіраўнік «Укртатнафты» Павал Аўчарэнка.
Беларускія нафтаперапрацоўчыя заводы найхутчэй таксама без энтузіязму сустрэнуць прапановы «Укртранснафты». У параўнаньні зь мінулым годам рэнтабэльнасьць «Белнафтахіму» скарацілася амаль у 20 разоў — да 1,5% супраць 27,1% за аналягічны пэрыяд 2006 г.
Апошні раз цана на бэнзін у Беларусі ўзьнімалася паводле адпаведнага загаду канцэрну «Белнафтахім» у жніўні. Тады падвышэньне патлумачылі павелічэньнем ставак мытных збораў, ростам цаны на нафту і ў мэтах забесьпячэньня прывабнасьці працы на ўнутраным рынку.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА19
Каментары