Леанід Заіка: Каб выжыць, ІП павінны змяніць фармат працы
Індывідуальныя прадпрымальнікі, якія хочуць захаваць бізнес ва ўмовах Беларусі ў межах Мытнага саюза, павінны кардынальна змяніць фармат сваёй дзейнасці. Такое меркаванне выказаў эканаміст Леанід Заіка, выступаючы 15 ліпеня ў Мінску на пасяджэнні круглага стала, прысвечанага праблемам малога і сярэдняга бізнесу.
У мерапрыемстве ўзялі ўдзел лідары прадпрымальніцкіх колаў беларускіх рэгіёнаў і сталіцы, у прыватнасці старшыня аргкамітэта па стварэнні прафсаюза індывідуальных прадпрымальнікаў «Разам» Ірына Яскевіч (Віцебск) і старшыня каардынацыйнага савета прадпрымальнікаў Мінска Алесь Макаеў.
Удзельнікі круглага стала падзяліліся сваім бачаннем праблем малога прадпрымальніцтва ў святле ўвядзення 1 ліпеня патрабаванняў тэхнічнага рэгламенту Мытнага саюза «Аб бяспецы прадукцыі лёгкай прамысловасці», які выклікаў шырокі рэзананс сярод прадпрымальнікаў і прывёў да забастовак на рынках і ў гандлёвых цэнтрах у канцы чэрвеня — пачатку ліпеня.
Паводле слоў Заікі, ён не бачыць сэнсу ў тым, каб прадстаўнікі малога і сярэдняга бізнесу Беларусі «працягвалі працу ў якасці індывідуальных прадпрымальнікаў яшчэ 20 гадоў».Ён лічыць, што складанасці, звязаныя з увядзеннем згаданага тэхрэгламенту, з`яўляюцца для ІП сігналам «да змены фармату свайго жыцця, кірунку і стратэгіі сваёй дзейнасці». «Усё, што звязана з рынкамі, кіёскамі, маленькімі металічнымі каробачкамі, будкамі, — гэта прывядзе вас у тупік», — сказаў эканаміст прадпрымальнікам.
Для выжывання ў рэгіёнах Заіка параіў прадпрымальнікам ствараць праграмы развіцця гандлёвай інфраструктуры. «Вы павінны пабудаваць сабе новыя будынкі і перабрацца ў іх, — сказаў ён. — Не сядзіце ў гэтых металічных будках.Прапануйце (мясцовым уладам. — БелаПАН.) стварыць новую сістэму гандлёвай, сацыяльнай інфраструктуры, сферы абслугоўвання. У той жа час, калі хочаце выжыць, вам трэба стварыць уласную гандлёвую сетку, свае холдынгі».
Эканаміст падкрэсліў, што калі не прытрымлівацца гэтых рэкамендацый, то малы бізнес у Беларусі рызыкуе быць выцесненым з рынку буйнейшымі гульцамі.
Паводле меркавання Заікі, не варта вінаваціць у бедах прадпрымальнікаў тэхнічныя рэгламенты, бо гэта «абсалютна нармальная рэч, якая ўстанаўліваецца ў мэтах аховы спажыўца па параметрах бяспекі, надзейнасці».Ён прывёў прыклад Еўрасаюза, тэхрэгламенты якога «практычна супадаюць з тэхрэгламентамі СНД».
«Але ў ЕС стандартызацыя і прыняцце рэгламентаў — машына, якая даўно працуе, і выконваецца яе галоўны прынцып: стварэнне аптымальных умоў для спажыўца. Тое, што адбываецца ў Беларусі, варта разглядаць як стаўленне ўлады да ўласнасці і бізнесу.
Выдаваць сертыфікаты, усе дакументы, якія тычацца пацвярджэння якасці тавару, павінны вытворцы, у крайнім выпадку аптовыя кампаніі.Вас наогул не павінны чапаць. Віна за тое, што так не адбываецца, ляжыць на чыноўніках Беларусі і Мытнага саюза», — падагульніў эканаміст.
Каментары